मागासवर्गीयांच्या विकासात कॉंग्रेस नेहमी अडथळा आणते-मोदी
नवी दिल्ली- काँग्रेस आणि त्यांचे सहकारी पक्ष विकासकामाबाबत नेहमीच काहीही बोलत असतात आणि नेहमीच मागासवर्गीयांच्या आणि आदिवासींच्या विकासात अडथळे येतील असे वागत असतात अशा शब्दांत पंतप्रधान नरेंद्र मोदींनी काँग्रेसवर तोफ डागली. इस्टर्न पेरिफेरल एक्स्प्रेस वे चे उद्घाटन केल्यानंतर ते उत्तर प्रदेशातील बागपत येथे बोलत होते. पायाभूत सुविधा निर्माण करताना त्यात जात, पंथ, धर्म आणि आर्थिक स्थिती यानुसार कधीही फरक केला जात नाही. दलितांवर होणाऱ्या अत्याचारांच्या घटनांविरोधातील खटले चालवण्यासाठी विशेष कोर्टांची स्थापना केल्याचे यावेळी मोदींनी सांगितले.
#WATCH: PM Narendra Modi says, 'Those who worship one family, can never worship democracy'. #EasternPeripheralExpressway pic.twitter.com/v5WRMHf7yK
— ANI (@ANI) May 27, 2018
शेतकऱ्यांच्या प्रश्नांबाबत संवेदनशील
सर्जिकल स्ट्राईक्स करणाऱ्या देशाच्या सेनेने दाखवलेल्या साहसाला हे लोक नाकारतात. जेव्हा आंतरराष्ट्रीय एजन्सीज भारताचे कौतुक करतात तेव्हा हे लोक त्यांच्याही मागे दांडके घेऊन मागे लागतात. त्यामुळे एका कुटुंबाची पुजा करणारे, कधी लोकशाहीची पुजा करू शकत नाहीत अशा शब्दात मोदींनी कॉंग्रेसचा समाचार घेतला. त्याचबरोबर शेतकऱ्यांबाबत बोलताना मोदी म्हणाले, सरकार शेतकऱ्यांच्या प्रश्नांबाबत संवेदनशील आहे. त्यांचे सर्व प्रश्न सोडवण्यासाठी आम्ही काम करीत आहोत. दरम्यान, योगी सरकारच्या काळात पोलिसांनी पकडण्याआधीच गुन्हेगार स्वतःहून आत्मसमर्पण करीत असल्याचे सांगत त्यांनी युपी सरकारच्या कारभाराचे कौतुक केले.
मोदी म्हणाले, मेक इन इंडिया योजनेमुळे मॅन्युफॅक्चरिंग क्षेत्राला बुस्ट मिळालं आहे. त्याच उदाहरण म्हणजे चार वर्षांपूर्वी देशात केवळ २ मोबाईल बनवणाऱ्या कंपन्या होत्या, त्या आता १२० पर्यंत पोहोचल्या आहेत. दिल्लीला मेरठशी जोडणाऱ्या दिल्ली-मेरठ एक्स्प्रेस वेचे उद्घाटन पंतप्रधान नरेंद्र मोदींच्या हस्ते आज (रविवार) झाले. तत्पूर्वी केंद्रीय मंत्री नितीन गडकरी यांनी सादरीकरणाद्वारे संपूर्ण एक्स्प्रेस वेची माहिती पंतप्रधानांना दिली. त्यानंतर या एक्स्प्रेस वेचे उद्घाटन मोदींनी केले. मोदींनी यादरम्यान ६ किमीपर्यंत रोड शोही केला.