डी.के.शिवकुमार यांना दिलासा; जामीन मंजूर !

नवी दिल्ली: काँग्रेसचे नेते पी. चिदंबरम यांच्या पाठोपाठ आता काँग्रेसचे संकटमोचक अशी ओळख असलेल्या डी.के.शिवकुमार यांना दिलासा देणारी बातमी समोर येत आहे. डी. के. शिवकुमार यांना दिल्ली उच्च न्यायालयाने जामीन मंजूर केला आहे. आर्थिक गैरव्यवहारांप्रकरणी ईडीने त्यांना अटक केली होती. सध्या ते न्यायालयीन कोठडीत आहे.

शिवकुमार यांना आर्थिक गैरव्यवहारांप्रकरणी ईडीने अर्थात अंमलबजावणी संचलनालयाने अटक केले होते. ते सध्या तिहार तुरुंगामध्ये आहेत. ५७ वर्षीय काँग्रेस नेते शिवकुमार यांनी कर चुकवला असून करोडोंचे व्यवहार केले आहेत, असा आरोप त्यांच्यावर ईडीने केला. दरम्यान, तुरूंगात असलेल्या शिवकुमार यांना दिल्ली उच्च न्यायालयात दिलासा मिळाला आहे. त्यांना देश सोडून न जाण्याच्या अटीसह २५ लाखांच्या जातमुचलक्यावर न्यायालयानं जामीन मंजूर केला आहे.

शिवकुमार यांना अटक करण्यात आल्यानंतर काही दिवसांनी त्यांची २३ वर्षीय मुलगी ऐश्वर्या यांची ईडीकडून चौकशी करण्यात आली. २०१३ मध्ये एक कोटी असणारं वार्षित उत्पन्न २०१८ मध्ये १०० कोटी कसं काय झालं यासंबंधी आम्हाला माहिती जाणून घ्यायची असल्याचं अधिकाऱ्यांनी सांगितलं होतं. तसंच त्यांच्यात आणि वडिलांमध्ये कोणते व्यवहार करण्यात आले यासंबंधी माहिती मिळण्याचाही तपास यंत्रणा प्रयत्न करत आहे.