पडघम गणेशोत्सवाचे: पर्यावरणपूरक गणेश मूर्तींना ग्राहकांचीही पसंती

मुंबई। गणेशोत्सव अवघ्या दीड महिन्यांवर येऊन ठेपलेला असल्याने ठिकठिकाणी मूर्ती बनविण्याच्या कामाला सुरूवातही झाली आहे. यंदा प्लास्टर ऑफ पॅरीस आणि आईल पेंट इ. वस्तू जीएसटीच्या फेर्‍यात अडकल्याने गणपती मूर्तींच्या किमती 40 टक्क्यांनी वाढणार असल्याचे म्हटले जात आहे. परिणामी भाविकांकडून यंदा पर्यावरणस्नेही मूर्तींची अधिक मागणी होऊ लागली आहे. त्यामुळे कारागीरांकडूनही मूर्ती घडवताना पर्यावरणस्नेही वस्तूंचा अधिकाधिक वापर करण्यात येत आहे. बहुसंख्य मूर्तीकारांनी मूर्तीला रंगांचा साज चढविण्यासाठी आता ऑईल पेंट ऐवजी वॉटर कलरचा वापर करण्याचे ठरवले आहे. वॉटर कलर पर्यावरणस्नेही असून वापर करण्यासही सोयीचा असल्याचे मूर्तीकार सांगतात.

ऑईल पेंटच्या वापरामुळे मूर्ती आकर्षक आणि चमकदार दिसतात. बहुतेककरून ऑईल पेंटचा वापर 6 फुटांपेक्षा जास्त म्हणजेच सार्वजनिक गणेशमूर्ती बनविण्यासाठीच केला जातो. या मूर्तींचे विसर्जन केल्यानंतर तीन दिवसांनी ऑईल पेंट समुद्राच्या पाण्यावर तरंगतो. या ऑईल पेंटमध्ये घातक केमिकलचा समावेश असल्याने हे केमिकल माशांचा जीव घेतात.

वॉटर कलरच का?
ऑईल पेंटमध्ये तेलाचे प्रमाण प्रचंड असल्याने मूर्तींचे विसर्जन केल्यानंतर या रंगाचा तवंग समुद्राच्या पाण्यावर तरंगताना दरवर्षी आपल्याला दिसतो. यामुळे समुद्रातील जीवांना मोठी हानी पोहोचते. त्यामुळेच आता मूर्तीकारांनी अधिकाधिक प्रमाणात वॉटर कलरचा वापर करण्याचे ठरवले आहे. वॉटर कलरमध्ये हानीकारक केमिकलचे प्रमाण अत्यंत नगण्य असते. ऑईल पेंटच्या तुलनेत वॉटर कलर स्वस्त असते.

घरगुती गणेशमूर्ती पर्यावरणस्नेही सार्वजनिक मंडळांच्या गणेशमूर्तींच्या तुलनेत घरगुती गणेशमूर्तींमध्येच पर्यावरणस्नेही मूर्तींचे सर्वाधिक प्रमाण दिसून येते. कारण कुटुंबातील कुठल्याही एका सदस्याला पर्यावरणाचे भान असेल, तर त्यांची अंमलबजावणी करतात.

वॉटर कलर अत्यंत पटकन बाजारात उपलब्ध होतो, सहजरित्या मूर्तीवर लावता येतो, तो जलदगतीने सुकतो आणि त्याची स्वच्छताही सहजपणे करता येते. याउलट ऑईल पेंट हाताला लागल्यावर त्वचेचे विकार होतात आणि पर्यावरणाचेही नुकसान होते. त्यामुळे कारागीर यंदा वॉटर कलरलाच प्राधान्य देत आहेत.
-अनिल परब, मूर्तिकार, घाटकोपर

Web Title- devotee prefer eco-friendly ganesh utsav