शासनाच्या निर्णयाला विरोध केला म्हणुन माझी बदनामी – धनंजय मुंडे

बीड- महामार्ग आणि शासनाच्या प्रकल्पासाठी शेतकऱ्यांच्या जमिनी सक्तीने घेण्याच्या सरकारच्या निर्णयाला विरोध केला म्हणूनच मुंजा गित्ते प्रकरणावरून आपल्या बदनामीचे षडयंत्र सुरू असल्याचे आरोप विधानपरिषद विरोधी पक्षनेते धनंजय मुंडे यांनी केला आहे. ज्या मुंजा गित्तेची जमीन जगमित्र कारखान्यासाठी घेण्यात आली होती त्या जमिनीचा संपूर्ण मोबदला त्यांना दिला आहे हवे असेल तर त्यांना आणि त्या परिसरातील शेतकऱ्यांनाही त्यांची जमीन देण्याची तयारीही धनंजय मुंडे यांनी दर्शविली आहे.

पत्र व्हायरल

मागील दोन दिवसांपासून सोशल मीडियाच्या माध्यमातून मुंजा गीते या शेतक-याची जमीन धनंजय मुंडे यांनी घेतली असल्याबाबतचे एक बदनामी करणारे पत्र व्हायरल झाले आहे. भाजपच्या नेत्यांनी याच पत्राचा आधार घेत धनंजय मुंडे यांची बदनामी करण्यासाठी त्याचा वापर केला जात आहे असे आरोप मुंडे यांनी केले आहे.

भाजप नेत्याचा प्रयत्न

जगमित्र साखर कारखान्यासाठी मुंजा गीते या व्यक्तीची जमीन घेण्यात आली होती त्यासाठीचा मोबदलाही त्यांना देण्यात आला असून त्याचे सर्व रेकॉर्ड कार्यालयात उपलब्ध आहे. असे असतानाही मागील चार वर्षांपासून सातत्याने मुंजा गित्ते यांच्या माध्यमातून भारतीय जनता पार्टीचे काही नेते आपली बदनामी करण्याचा प्रयत्न करीत आहेत .

सरकारने मागील आठवड्यात घेतलेल्या एका भूसंपादना संबंधीच्या निर्णयाला मी कडाडून विरोध केल्यामुळे पुन्हा एकदा आपली बदनामी करण्यासाठी श्री मुंजा गीते यांचा वापर केला जात आहे.

जमीन परत करेल

मी शेतकऱ्याचा मुलगा आहे शेतकऱ्याच्या जमिनीचे मूल्य आणि महत्व मला चांगलेच माहित आहे माझ्या शेतक-यांच्या बांधवांची जमीन मी कदापिही घेणार नाही. गीते यांना यांनाच नव्हे तर या प्रकल्पासाठी ज्यांनी ज्यांनी जमिनी दिल्या आहेत त्या सर्वांना त्यांची इच्छा असेल तर खरेदी केलेल्या भावात किंवा आजच्या भावात त्या जमिनी परत करण्याचीही आपली तयारी आहे. कारखाना सुरू झाला नसल्यामुळे त्यांच्या मुलांना नोकरी देण्याचा प्रश्नच येत नाही प्रकल्प सुरू झाला असता तर त्यांना नक्कीच नोकरी दिली असती .

ज्या ज्या वेळी मी सरकार विरुद्ध जनतेच्या प्रश्नासाठी संघर्ष करतो त्या त्या वेळी मला बदनाम करण्याचा प्रयत्न केला जातो शासनाच्या प्रकल्पासाठी शेतकऱ्यांची जमीन त्यांच्या संमतीशिवाय घेण्याचा निर्णय मागील आठवड्यात घेण्यात आला आहे. या निर्णयाला मी कडाडून विरोध केल्यामुळे आता पुन्हा एकदा आपल्या बदनामीचे षडयंत्र सुरू झाले. आहेत गीते यांनी विरोधकांच्या या कटात सहभागी होऊ नये असे आवाहन ही त्यांनी गित्ते यांना केले आहे.