डॉ.पायल तडवी आत्महत्याप्रकरण; तीन डॉक्टरांना अटक

मुंबई: नायर रुग्णालयातील डॉ.पायल तडवी याने रँगिंगला कंटाळून आत्महत्या केली. या घटनेवरून संपूर्ण राज्यात संताप व्यक्त होत आहे. दरम्यान या प्रकरणी आता पर्यंत तीन जणांना डॉक्टरांना अटक करण्यात आली आहे. या प्रकरणी करण्यात आलेल्या पहिल्या कारवाईत डॉ. भक्ती मेहर यांना अटक करण्यात आली होती. आता डॉ. हेमा आहुजा, डॉ. अंकिता खंडेलवालला अटक करण्यात मुंबई पोलिसांना यश आले आहे.

तीन महिला सहकारी डॉक्टरांकडून होणाऱ्या रँगिंगला कंटाळून डॉ. पायल तडवी यांनी गळफास घेऊन नायर हॉस्पिटलच्या वसतिगृहात आत्महत्या केल्याची धक्कादायक नुकतीच घटना घडली आहे. याप्रकरणी आग्रीपाडा पोलीस ठाण्यात तीन महिला डॉक्टरांविरुद्ध गुन्हा दाखल करण्यात आला होता. त्यानुसार तिन्ही डॉक्टरांना अटक करण्यात पोलिसांना यश आले आहे. या घटनेनंतर नायर रुग्णालयाबाहेर आंदोलने देखील करण्यात आली होती. राज्याचे वैद्यकीय शिक्षण मंत्री गिरीश महाजन यांनी मंगळवारी आंदोलनकर्त्यांची आणि डॉ.पायल तडवीच्या कुटुंबियांची भेट घेतली होती. आरोपींना लवकरच अटक करण्यात येईल अशी माहिती दिली होती. संबंध राज्यात होणारा उद्रेक पाहता पोलिसांनी कारवाईचा बडगा उचलत डॉ. भक्ती हिला बेड्या ठोकल्या होत्या याप्रकरणात अन्य दोन महिला डॉक्टर डॉ. अंकिता खंडेलवाल आणि डॉ. हेमा आहुजा या फरार होत्या. मात्र त्यांना अटक करण्यात आली आहे. तिन्ही महिला डॉक्टरांनी कोर्टात अटक टाळण्यासाठी अटकपूर्व जामिनाचे अर्ज दाखल केले आहेत. आज या अटकपूर्व जामीन अर्जावर कोर्टात सुनावणी होण्याची शक्यता आहे.

टोपीवाला राष्ट्रीय वैद्यकीय महाविद्यालय आणि बीवायएल नायर हॉस्पिटलमध्ये पदव्युत्तर अभ्यासक्रमाच्या स्त्री रोग विभागात दुसऱ्या वर्षात (एम.डी) शिक्षण घेत असलेल्या डॉ.पायल तडवी यांना वरिष्ठ असलेल्या सहकारी डॉ. हेमा आहुजा, डॉ.भक्ती मेहेरे आणि डॉ. अंकिता खंडेलवाल या तिघांकडून मानसिक त्रास आणि अपमानित केले जात होते. याला कंटाळून पायलने टोकाचा निर्णय घेत गळफास घेऊन आत्महत्या केली. पायलचे फेब्रुवारी 2016 साली सलमान तडवी यांच्या लग्न झाले. सलमान सध्या कूपर रुग्णालयात सहाय्यक प्राध्यापक म्हणून काम करतात. ते मूळचे भुसावळच्या रावेर येथील आहेत. पायलने यापूर्वी गडचिरोली जिल्ह्यात डॉक्टर म्हणून काम केले आहे. तीन महिला डॉक्टरांविरोधात आग्रीपाडा पोलीस ठाण्यातअ‍ॅट्रॉसिटी, रॅगिंगविरोधी कायदा आणि माहिती तंत्रज्ञान कायद्यातील विविध कलमांनुसार गुन्हा दाखल करण्यात आला आहे.