गोव्यात मिग २९ के लढाऊ विमान कोसळले

गोवा: गोव्यात भारतीय नौदलाचे मिग २९ के हे लढाऊ विमान प्रशिक्षणादरम्यान कोसळले. ही घटना दुपारी १२च्या सुमारास घडल्याचे सांगण्यात येत आहे. सुदैवाने यातून लेफ्टनंट कमांडर दीपक यादव आणि कॅप्टन एम. शेवखंड यांनी उड्या मारल्याने ते बचावले. हे विमान निर्मनुष्य भागात कोसळल्यानं कोणतीही जीवितहानी झालेली नाही. विमानाला आग लागल्याचे कळताच वैमानिकांनी पॅराशूटचा वापर करत उड्या मारल्या.

दाबोळी येथे नौदलाचा आयएनएस हंसा हा तळ आहे. तिथूनच हे विमान उडाले होते. उडान घेताच विमानात बिघाड झाला व आग लागली. वेर्णा- कांसावलीच्या पट्ट्यातविमान कोसळले. हे विमान जर जवळच्याच वास्को येथील भागातील तेल टाक्या असलेल्या ठिकाणी कोसळले असते तर मोठी हानी झाली असती अशा प्रकारची चर्चा वास्कोवासियांत सुरू आहे. पठारावर विमान कोसळल्याने मनुष्यहानी झाली नाही, याविषयी गोमंतकीयांत समाधान व्यक्त होत आहे.

गोव्यात नौदलाची विमाने कोसळण्याच्या घटना यापूर्वीही घडलेल्या आहेत. विमान कोसळून मनुष्यहानी झाल्याच्याही घटना यापूर्वी झाल्याची नोंद आहे. सकाळच्यावेळी नौदलाच्या कवायती सुरू असतात. कवायतीवेळीही विमान दुर्घटना यापूर्वीच्या काळात झालेल्या आहेत. नौदलाचे विमान शनिवारी नेमके कोणत्या कारणास्तव कोसळले याची चौकशी संबंधित यंत्रणोकडून केली जाईल. विमान कोसळल्यानंतर लोकांना धुराचे प्रचंड मोठे लोट येताना दिसले.