कासवा ग्रामपंचायतीचे सहा सदस्य अपात्र

जात प्रमाणपत्र सादर न केल्याचा ठपका

जळगाव – शासनाने दिलेल्या विहित मुदतीत जात प्रमाणपत्र सादर न केल्याने कासवा (ता. यावल) येथील सहा ग्रामपंचायत सदस्यांवर अपात्रतेची कारवाई करण्यात आली आहे. तक्रारदार मंगला विनोद तायडे ( कठोरा ता. यावल) यांनी याप्रकरणी तक्रार दाखल केली होती. जिल्हाधिकारी डॉ. अविनाश ढाकणे यांनी यावर हा निर्णय दिला आहे. कासवा ग्रामपंचायतीतील सातपैकी सहा सदस्य अपात्र झाले आहे.
सुधाकर रामा कोळी, दशरथ अर्जुन सपकाळे, आशा शंकर सपकाळे यांनी एसटीचे, तर सविता प्रशांत साळवे यांनी एससीचे, तर संगीता जयेश कोळी, कल्पना प्रकाश सपकाळे यांनी ओबीसीचे प्रमाणपत्र सादर न केल्याने ही अपात्रतेची कारवाई झाली. तर सदस्य पुनम गोपाळ तायडे यांनी वेळेत प्रमाणपत्र सादर केल्याने त्यांचे पद कायम राहिले आहे. २०१५ मध्ये झालेल्या निवडणुकीत ते निवडून आले होते. यानंतर वर्षभरापर्यत मुदत देवुनही जातीचे प्रमाणपत्र ते सादर करु शकले नव्हते. अखेर पंचवार्षीक कार्यभार समाप्त होण्याच्या वर्षभर आधीच ही कारवाई झाली. यामुळे तेथे पुन्हा निवडणुका घेतल्या जाणार आहे.

आचलगाव सरपंचावर अविश्वास कायम
आचलगाव (ता. भडगाव) येथील सरपंच गौरख मधुकर पाटील यांच्या विरुद्ध १० सदस्यांनी अविश्वास ठराव दाखल केला होता. यानंतर त्यांचा २४ डिसेंबर २०१८ मध्ये राजीनामा घेतला होता. दरम्यान सुनावणी वेळी त्यांनी आपण निरक्षर असुन दिशाभुल करुन राजीनाम्यावर सही घेतल्याचा दावा गोरख पाटील यांनी केला होता. यावर जिल्हाधिकारी डॉ. ढाकणे यांनी निरक्षर व्यक्ती सरपंच पदावर कसे काम करू शकेल, असे सांगत अविश्वास ठराव कायम केला असल्याची माहिती जिल्हाधिकारी कार्यालयाचे वकील हारुन देवरे यांनी सांगितले.