‘हिज्बुल मुजाहिद्दीन’च्या दोन दहशतवाद्यांचा खात्मा

पुलवामा: काश्मीरमधील पुलवामा येथील चकमकीत सुरक्षा दलांनी दोन दहशतवाद्यांचा खात्मा केला आहे. हे दोन दहशतवादी ‘हिज्बुल मुजाहिद्दीन’ या संघटनेचे होते. यातील एका दहशतवाद्याची ओळख पटली असून शौकत अहमद असे या दहशतवाद्याचे नाव आहे. शौकत हा चार वर्षांपूर्वी दहशतवादी संघटनेत सामील झाला होता.

पुलवामा येथील अवंतीपोरा येथील पंझगाम येथे दहशतवादी लपून बसल्याची माहिती सुरक्षा दलांना मिळाली होती. यानुसार शुक्रवारी रात्रीपासून सुरक्षा दलांनी परिसरात शोधमोहीम राबवली होती. या दरम्यान शनिवारी पहाटे दहशतवाद्यांनी सुरक्षा दलांवर गोळीबार केला. यानंतर झालेल्या चकमकीत दोन दहशतवाद्यांचा खात्मा करण्यात आला. यातील एका दहशतवाद्याची ओळख पटली असून दुसऱ्या दहशतवाद्याची ओळख पटवण्याचे काम सुरु आहे. दहशतवाद्यांकडून शस्त्रसाठाही जप्त करण्यात आला आहेे.