चांद्रयान मोहिमेसाठी आजची रात्र ऐतिहासिक ; लँडर मध्यरात्रीनंतर चंद्रावर !

बेंगळुरू: चंद्रावरील जीव सृष्टीचा अभ्यास करण्यासाठी पाठविण्यात आलेल्या संपूर्ण स्वदेशी बनावटीचे चांद्रयान-२ मोहिमेची यशस्वी वाटचाल सुरु आहे. चांद्रयान-२ चे लँडर असलेले ‘विक्रम’ चांद्रभूमीवर उतरण्यासाठी उद्या शनिवारपासून पूर्वप्रयत्न सुरू करणार आहे. चंद्रावर सुरक्षितरीत्या उतरण्यासाठी या मोहिमेतील हा सर्वात अखेरचा टप्पा असणार आहे. याची सुरुवात शनिवारी पहाटे होणार आहे. या ऐतिहासिक क्षणाची संपूर्ण देशवासियांना आस लागून आहे.

चांद्रयानाचे विक्रम लँडर सध्या चंद्राभोवतीची कक्षा कमी करत चंद्राच्या अधिकाधिक जवळ जाण्याचा प्रयत्न करत आहे. हा प्रयत्न यशस्वी होत असल्याने नियोजित दिवशी म्हणजेच उद्या शनिवारी विक्रम चंद्रावर उतरेल, याबद्दल इस्रोच्या शास्त्रज्ञांना विश्वास आहे. विक्रम लँडरसोबत प्रज्ञान हे रोव्हर देण्यात आले आहे.

विक्रम आपल्या अवतरणाची प्रक्रिया शुक्रवारी उत्तररात्री किंवा शनिवारी पहाटे १ ते २ वाजण्याच्या काळात सुरू करणार आहे. त्यानंतर विक्रम त्यासोबत असलेल्या प्रज्ञान या रोव्हरला घेऊन चंद्राच्या पृष्ठभागावर उतरणार आहे. भारतासाठी ही अत्यंत गौरवास्पद कामगिरी ठरणार असून यामुळे चंद्रावर स्वतःचे यान उतरवणारा भारत हा रशिया, अमेरिका व चीन यांच्यानंतरचा चौथा देश ठरेल. मात्र चंद्राच्या दक्षिण ध्रुवावर यान उतरवणारा भारत हा पहिला देश असेल.