समलैंगिकतेबाबत आज न्यायालयात  सुनावणी 

नवी दिल्ली-समलैंगिकतेविषयक प्रकरणे गुन्ह्याच्या चौकटीबाहेर ठेवण्यात यावेत यासाठी दाखल करण्यात आलेल्या याचिकेवर सुप्रीम कोर्टाच्या घटनापीठासमोर आज मंगळवारपासून सुनावणी  होणार आहे. यामध्ये समलैंगिकतेबाबत निर्णय होण्याची शक्यता आहे. सुप्रीम कोर्टाने यापूर्वीच याप्रकरणी फेरयाचिका फेटाळून लावली होती. त्यानंतर क्युरेटिव्ह याचिका दाखल करण्यात आली होती.  या याचिकेची सुनावणी घटनापीठासमोर करण्यात येणार असल्याचे सरन्याायधिशांनी स्पष्ट केले होते.

सरन्यायाधिशांचा समावेश असणाऱ्या खंडपीठाने हे प्रकरण घटनापीठाकडे वर्ग केले होते. या याचिकेनुसार, ३७७ व्या कलमातील कायदेशीर बाबीला आव्हान देण्यात आले आहे. या कलमानुसार, दोन सज्ञान व्यक्तींनी एकमेकांच्या सहमतीने अनैसर्गिक संबंध ठेवल्यास तो गुन्हा मानण्यात येईल. तसेच या प्रकरणी १० वर्षांपर्यंत शिक्षा किंवा जन्मठेपेच्या शिक्षेची तरतुद करण्यात आली आहे. मात्र, कलम ३७७ हे संविधानविरोधात असल्याचे याचिकेत म्हटले आहे.

सुप्रीम कोर्टाने ११ सप्टेंबर २०१३ रोजी समलैंगिकतेबाबत दिलेल्या आपल्या ऐतिहासिक निर्णयात जन्मठेपेची शिक्षा राखून ठेवली होती. दिल्ली हायकोर्टाने दोन व्यक्तींनी परस्पर सहमतीने समलैंगिक संबंध प्रस्थापित करण्याला कायद्याच्या चौकटीबाहेर ठेवले होते. हा आदेश सुप्रीम कोर्टाने रद्दबातल ठरवला होता. यासंबंधी क्युरेटिव्ह पेटिशन दाखल करण्यात आल्यानंतर सुप्रीम कोर्टाने खुल्या कोर्टात यावर सुनावणी घेण्याचा निर्णय घेतला होता.

सुप्रीम कोर्टातील संक्षिप्त सुनावणीत सरन्यायाधीशांनी सांगितले होते की, हे प्रकरण गंभीर असून संविधानाशी निगडीत आहे. त्यामुळे या प्रकरणाची सुनावणी ५ न्यायाधिशांच्या खंडपीठासमोर व्हावी. यासाठी मोठ्या खंडपीठाची निर्मिती केली जाईल तसेच हे प्रकरण घटनापीठाकडे पाठवले जाईल असे सरन्यायाधिशांनी सांगितले होते. क्युरेटिव्ह याचिका दाखल करणाऱ्यांच्यावतीने ज्येष्ठ विधीज्ञ कपिल सिब्बल यांनी कोर्टात बाजू मांडली होती.