आज राजकीय पक्षाच्या महत्वपूर्ण बैठका

मुंबई : शिवसेना आणि भाजपाचा सत्ता संघर्ष संपण्याची चिन्हे दिसत नसून, आज मुंबईत भाजपा नेत्यांची महत्वपूर्ण बैठक होत आहे. आज होणाऱ्या बैठकीत भाजप आपला विधिमंडळ पक्षाचा नेता निवडणार आहे. विशेष म्हणजे आजच भाजप अध्यक्ष आणि केंद्रीय गृहमंत्री अमित शहाही मुंबईत दाखल होत आहेत. शिवसेना, कॉंग्रेस, राष्ट्रवादी कॉंग्रेस पक्षाच्या महत्वपूर्ण बैठकीचे आयोजन करण्यता येणार असून, आपल्या नेत्यांची निवड करण्यात येणार असल्याचे बोलले जात आहे. राजकीय पक्षाच्या दृष्टीने आजचा दिवस महत्त्वाचा मानला जात आहे.

भारतीय जनता पक्षाच्या विधिमंडळ नेतेपदी देवेंद्र फडणवीस यांची, तर शिवसेनेच्या विधिमंडळ नेतेपदी आदित्य ठाकरे यांची निवड होईल असे सांगितले जात आहे. तर, काँग्रेसचा विधिमंडळ पक्षाचा नेता कोण यावरही काँग्रेसच्या बैठकीत निर्णय घेतला जाणार आहे. काँग्रेस पक्षात प्रदेशाध्यक्ष बाळासाहेब थोरात, विजय वडेट्टीवार आणि नाना पटोले यांच्या नावांची चर्चा आहे. मात्र, काँग्रेसच्या विधिमंडळ पक्षाच्या नेतेपदी कोण विराजमान होणार याचा अंतिम निर्णय दिल्लीत होणार असल्याचे समजते.

राष्ट्रवादी काँग्रेसच्या विधिमंडळ पक्षाच्या नेतेपदी अजित पवार, धनंजय मुंडे, जयंत पाटील आणि दिलीप वळसे-पाटील यांच्या नावांची चर्चा आहे. मात्र, याबाबतचा अंतिम निर्णय पक्षाध्यक्ष शरद पवार यांच्या हातात असल्याचे राष्ट्रवादी काँग्रेस पक्षातील सूत्रांनी सांगितले. महाराष्ट्र नवनिर्माण सेना (मनसे) पक्षाचे राजू पाटील हे एकमेव आमदार निवडून आले असल्याने पाटील हे मनसेचे नेते असतील. तर समाजवादी पक्षाच्या नेतेपदी अबु आसिम आझमी बविआचे हितेंद्र ठाकूर हे नेतेपदी असतील. तर एमआयएमच्या नेतेपदी डॉ. फारुख शाह किंवा मौलाना मुफ्ती इस्माईल यांची निवड होण्याची शक्यता आहे. तर प्रहार जनशक्ती पक्षाच्या नेतेपदी आमदार बच्चू कडू यांची निवड अपेक्षित आहे.