ट्रकमधील संपूर्ण साखरेच्या माल परस्पर विकणार्‍यास अटक

सोलापूर जिल्ह्यातील होता ट्रक ; फरार वरणगावच्या संशयितास एलसीबीकडून अटक

जळगाव- सोलापूर जिल्ह्यातून साखरेच्या मालाचा ट्रक मूळ मालकाकडे न पोहचविता त्यातील माल परस्पर विकून टाकण्याची घटना 2009 मध्ये घडली होती. याप्रकरणी सोलापूर जिल्ह्यातील अकलूज पोलीस ठाण्यात गुन्हा दाखल आहे. या गुन्ह्यातील फरार संशयित मुन्ना मोहनलाल परदेशी उर्फ राहूल पारस यास जळगाव स्थानिक गुन्हे शाखेच्या पथकाने गुरुवारी वरणगाव शहरातील रामपेठ भागातून अटक केली आहे.

साखरेचा माल परस्पर विकल्याच्या गुन्ह्यात यापूर्वी वरणगाव शहरातून विजय एकनाथ बोदडे वय 55 यास अटक करण्यात आली. मुन्ना परदेशी फरार होता. त्याच्या शोध घेण्यासाठी सोलापूर ग्रामीणचे पोलीस अधीक्षक यांनी पोलीस अधीक्षक डॉ. पंजाबराव उगले यांच्याशी संपर्क केला होता. अधीक्षक उगले यांच्या आदेशानुसार स्थानिक गुन्हे शाखेचे पोलीस निरिक्षक बापू रोहम यांच्यासह पोलीस उपनिरिक्षक कैलास पाटील, अनिल इंगळे, संजय सपकाळे, सुरेश महाजन, रमेश चौधरी , संतोष मायकल, इंद्रीस पठाण यांनी मुन्ना परदेशी यास वरणगावातून ताब्यात घेतले. त्याला तपासकामी अकलूज पोलिसांच्या ताब्यात देण्यात आले आहे.

शिरपूरहून मोबाईल चोरटा अटकेत
नुतन मराठा महाविद्यालयासमोरील हौसिंग सोसायटीतील रहिवासी राजेश रघुविर गुप्ता यांच्या घरातून मोबाईल लांबविल्याप्रकरणी शहर पोलीस ठाण्यात गुन्हा दाखल होता. संशयित शिरपूरात असल्याची माहिती स्थानिक गुन्हे शाखेचे पोलीस निरिक्षक बापू रोहम यांना मिळाली होती. त्यानुसार त्यांनी सहाय्यक पोलीस निरिक्षक सागर शिंपी, नारायण पाटील, बापू पाटील, योगेश पाटील, मनोज दुसाने, सुशील पाटील, प्रविण हिवराळे, विजय पाटील, दिनेश बडगुजर, नरेंद्र वारुळे यांचे पथक शिरपूर, चोपडा येथे रवाना केले होते. पथकाने कमलेश शालीक माळी वय 27 रा. शिरपूर यास ताब्यात घेतले. त्याला पुढील कारवाईसाठी जळगाव शहर पोलिसांच्या ताब्यात देण्यात आले आहे. तपास शहर पोस्टेचे पोलीस हेडकॉन्स्टेबल विजयसिंग पाटील करीत आहेत.