जम्मू-काश्मीरमध्ये दगडफेकीत पर्यटकाचा मृत्यू

जम्मू- काश्मीर :- जम्मू-काश्मीरमध्ये दगडफेकीत एका पर्यटकाचा मृत्यू झाला आहे. सोमवारी चकमकीविरोधात स्थानिकांनी दगडफेक केली होती. या दगडफेकीमध्ये चेन्नईचा रहिवासी थिरुमनी (वय २१) या पर्यटकाचा मृत्यू झाला आहे.

दगडफेकीमध्ये थिरुमनी हा गंभीर जखमी झाला होता, त्याला स्थानिक रुग्णालयात उपचारासाठी दाखल करण्यात आले. मात्र, रात्री त्याचा उपचारादरम्यान मृत्यू झाला. शनिवारी झालेल्या चकमकीत तीन दहशतवाद्यांचा खात्मा करण्यात आला होता. त्यानंतर शोपियाँ, पुलवामा या भागांमध्ये स्थानिक रस्त्यावर उतरले. सोमवारी फुटिरतावाद्यांनी बंदची हाक दिली होती श्रीनगर- गुलमर्ग मार्गावर निदर्शकांनी पर्यटकांच्या गाड्यांना लक्ष्य केले. थिरुमनी ज्या बसमध्ये होता, त्यामध्ये एकूण ४० जण होते. पर्यटकाच्या मृत्यूचे वृत्त समजताच जम्मू- काश्मीरच्या मुख्यमंत्री मेहबुबा मुफ्ती यांनी मृत तरुणाच्या कुटुंबीयांची रुग्णालयात भेट घेत त्यांचे सांत्वन केले.