वर्ल्ड कपच्या पहिल्या सामन्यापूर्वी बुमराहची ‘डोपिंग’ चाचणी

इंग्लंड: भारतीय संघ वर्ल्ड कप मोहिमेच्या पहिल्याच सामन्यात दक्षिण आफ्रिकेचा सामना करणार आहे. भारतीय संघ बुधवारी वर्ल्ड कप स्पर्धेतील पहिला सामना खेळणार आहे आणि त्यांना दक्षिण आफ्रिकेचा सामना करावा लागणार आहे. या सामन्यापूर्वी बुमराहची नियमित उत्तेजक चाचणी करण्यात आली. जागतिक उत्तेजक चाचणी संघटनेच्या मान्यताप्राप्त संस्थेकडे बुमराहने ही चाचणी करून घेतली.

आफ्रिकेला वर्ल्ड कप स्पर्धेत दोन पराभवांचा सामना करावा लागला असला तरी त्यांना हलक्यात लेखण्याची चूक भारतीय संघ करणार नाही. कर्णधार विराट कोहलीच्या नेतृत्वाखाली भारतीय संघ जेतेपदाच्या निर्धाराने मैदानात उतरणार आहे. त्यासाठी भारतीय खेळाडू कसून सरावाला लागले आहेत. विशेषतः भारतीय गोलंदाज आपला दबदबा सिद्ध करण्यासाठी तयार झाले आहेत. भारताकडे जगातील सर्वोत्तम गोलंदाज जसप्रीत बुमराह आहे. त्याच्या मदतीला भुवनेश्वर कुमार व मोहम्मद शमी हा तोफखाना आहे. त्यामुळे सध्याच्या घडीला भारताची गोलंदाजी ही सर्वात घातक मानली जात आहे.