‘काला’ चित्रपटासाठी रजनीकांतची मुख्यमंत्र्याकडे मदतीची मागणी

बंगळूर-सुपरस्टार रजनीकांत यांचा बहुचर्चित ‘काला’हा चित्रपट उद्या गुरुवारी प्रदर्शित होत आहे. मात्र, कर्नाटकात याच्या प्रदर्शनाला अजूनही विरोध होत आहे. अखेर रजनीकांत यांनी स्वत: कर्नाटकचे मुख्यमंत्री एच.डी कुमारस्वामी यांच्याकडे विनंती केली आहे. चित्रपटगृहांमध्ये सुरक्षा पुरवण्याची विनंती त्यांनी केली आहे. कावेरी पाणीवाटपाच्या प्रश्नावरून रजनीकांत यांनी काही दिवसांपूर्वी एक वक्तव्य केले होते. त्यावरूनच ‘काला’ चित्रपटाला विरोध होत आहे.

कावेरी पाणी वाटपावरून वाद

कर्नाटक फिल्म चेंबर्स ऑफ कॉमर्सकडून या चित्रपटावर बंदी घालण्याची मागणी करण्यात येत आहे. तर चित्रपटगृह मालकांच्या इच्छेनुसार त्यांनी हा चित्रपट प्रदर्शित करावा असे आदेश कोर्टाकडून मंगळवारी देण्यात आले. त्याचप्रमाणे अशा चित्रपटगृहांबाहेर सुरक्षा बंदोबस्त पुरवण्याची जबाबदारी राज्य सरकारची असेल हेसुद्धा कोर्टाने स्पष्ट केले. कोर्टाच्या आदेशांचं पालन करणार असल्याचं सांगतानाच ही वेळ चित्रपट प्रदर्शनासाठी योग्य नाही अशी टिप्पणी मुख्यमंत्री कुमारस्वामी यांनी केली आहे. म्हणूनच रजनीकांत यांनी त्यांना विनंती केली आहे.

रजनीकांत यांनी कावेरी नदीतून तामिळनाडूला जास्तीचे पाणी मिळावे अशी मागणी केली होती. या मागणीमुळेच या चित्रपटाला विरोध करण्याचे कर्नाटकातील काही संघटनांनी ठरवले होते. सर्वोच्च न्यायालयाने १६ फेब्रुवारी रोजी कावेरीच्या पाणीवाटपासंदर्भात आदेश दिला होता. या आदेशामुळे तामिळनाडू ऐवजी कर्नाटकाला जास्त पाणी मिळालं आहे. याचा निषेध करण्यासाठी रजनीकांत आणि कमल हसन या दक्षिणेतील दिग्गज कलाकारांनी आंदोलन देखील केले होते.