नक्षलवादविरोधी कारवाईत पहिल्यांदाच महिला कमांडो सहभागी; २ नक्षल्यांचा खात्मा

दंतेवाडा:छत्तीसगडमधील दंतेवाडात डीआरजी आणि एसटीएफच्या पथकाने कारवाई करत दोन नक्षलवाद्यांचा खात्मा केला. अरनपूरजवळच्या गोंदरसच्या जंगलात आज बुधवारी पहाटे ही कारवाई करण्यात आली. विशेष म्हणजे या कारवाईत पहिल्यांदाच महिला कमांडो सहभागी झाल्या होत्या.

दंतेवाडामधील अरनपूर परिसराजवळ गोंदरसच्या जंगलात बुधवारी पहाटे पाच वाजताच्या सुमारास नक्षलवादी आणि डीआरजी, एसटीएफ पथकातील जवानांमध्ये चकमक झाली. जवानांनी दोन नक्षलवाद्यांना ठार करण्यात आले आहे. घटनास्थळावरून मोठ्या प्रमाणात शस्त्र जप्त करण्यात आले आहे. ‘डीआरजी आणि एसटीएफने केलेल्या संयुक्त कारवाईत डिस्ट्रिक्ट रिझर्व्ह गार्ड फिमेल कमांडोज (दंतेश्वरी दल) सहभागी झाल्या होत्या. या दलामध्ये नक्षली अथवा शरण आलेल्या नक्षलवाद्यांच्या पत्नींना सहभागी करून घेतले जाते. एकूण ३० महिला या दलात असतात.