मराठा आरक्षण: मेडिकल प्रवेशासाठी अध्यादेश जारी !

मुंबई: मराठा आरक्षणामुळे वैद्यकीय प्रवेशासंदर्भात निर्माण झालेला पेच सोडवण्यासाठी राज्य सरकारने अखेर पुढाकार घेतला आहे. आज शुक्रवारी झालेल्या मंत्रिमंडळ बैठकीत यासंदर्भात अध्यादेश जारी करण्याचा महत्त्वाचा निर्णय घेण्यात आला. वैद्यकीय पदव्युत्तर अभ्यासक्रमासाठी मराठा आरक्षणातून प्रवेश घेतलेल्या परंतु सर्वोच्च न्यायालयाच्या निकालामुळे प्रवेश रद्द झालेल्या विद्यार्थ्यांना यामुळे दिलासा मिळाला आहे.

निवडणूक आयोगाची परवानगी घेऊन मंत्रिमंडळाची बैठक पार पडली. या बैठकीत वैद्यकीय पदव्युत्तर प्रवेश वादावर तोडगा काढण्यासाठी अध्यादेश काढण्याचा निर्णय घेण्यात आला, अशी माहिती महसूलमंत्री आणि मराठा आरक्षण अंमलबजावणी मंत्रिमंडळ उपसमितीचे अध्यक्ष चंद्रकांत पाटील यांनी दिली. आत्तापर्यंत झालेले प्रवेश तसेच राहतील. शिवाय पदव्युत्तर वैद्यकीयची प्रवेशप्रक्रिया पूर्ण करण्यासाठी सर्वोच्च न्यायालयाने २५ मेपर्यंत मुदत दिली असून ती ३० मे पर्यंत वाढवून देण्याची विनंती करणारा अर्ज सरकारने न्यायालयात केला आहे, असेही पाटील यांनी स्पष्ट केले.

परिणामी आतापर्यंत झालेले प्रवेश तसेच कायम राहणार आहेत. ज्या १९५ पीजी आणि ३२ डेंटल पीजीच्या विद्यार्थ्यांच्या प्रवेशाचा पेच सर्वोच्च न्यायालयाच्या निर्णयामुळे निर्माण झाला आहे त्यांच्या प्रवेशासाठी जागा वाढवून मिळवण्याचा प्रस्ताव सरकारने केंद्राकडे पाठवला आहे. ज्या विद्यार्थ्यांना या आरक्षण प्रक्रियेमुळे प्रवेश मिळणार नाहीत, अशा विद्यार्थ्यांनी खासगी विद्यापीठांमध्ये किंवा डीम्ड विद्यापीठांमध्ये प्रवेश घ्यावेत, अशा विद्यार्थ्यांसाठी राज्य सरकार शिष्यवृत्ती देणार असल्याचीही घोषणा करण्यात आली. मंत्रिमंडळ बैठकीनंतर चंद्रकांत पाटील यांनी ही माहिती पत्रकार परिषदेत दिली.