मिशन चांद्रयान-२ मोहीमेला उरले अवघे काही तास !
श्रीहरिकोटा: चांद्रयान-१ नंतर १० वर्षांनी इस्रोची मिशन चांद्रयान-२ मोहीम हाती घेण्यात आले आहे. या मोहिमेला अवघे काही तास उरले आहेत. उद्या १५ जुलै रोजी पहाटे २ वाजून ५१ मिनिटांनी श्रीहरिकोटा येथील सतीश धवन स्पेस सेंटर येथून GSLV मार्क-३च्या मदतीने चांद्रयान-२ अवकाशात झेपवणार आहे. लॉन्चिंग नंतर ५२ दिवसाने चांद्रयान-२ चंद्रावर पोहोचेल. इस्रोच्या या महत्त्वकांशी मोहीमेकडे केवळ भारताचेच नव्हे तर जगाचेही लक्ष लागले आहे.
चांद्रयान-२ ला भारतातील सर्वात शक्तिशाली रॉकेट GSLV मार्क-३च्या मदतीने लॉन्च केले जाणार आहे. लॉन्चिंगनंतर चांद्रयान पृथ्वीच्या कक्षेत पोहोचेल. १६ दिवस पृथ्वीची परिक्रमा केल्यानंतर चांद्रयान चंद्राच्या दिशेने जाईल. या दरम्यान चांद्रयानाचा वेग अधिकाधिक १० किलोमीटर प्रति सेकंद आणि कमीत कमी ताशी ३ किलोमीटर असेल.
लोकांना या ऐतिहासिक क्षणाचा साक्षीदार होण्यासाठी इस्रोने गेल्या काही दिवसांपासून थेट प्रक्षेपण दाखवण्याची सोय उपलब्ध करून दिली आहे. यासाठी एका खास गॅलरीची तयार करण्यात आली आहे. या गॅलरीत १० हजार लोक बसू शकतात. तुम्हालाही या चांद्रयान-२चे प्रक्षेपण पाहायचे असेल तर तुम्ही https://liveregister.isro.gov.in/LRC/ या लिंकवर जाऊन नोंदणी करता येणार आहे.
२००९ मध्ये पाठवलेल्या चांद्रयानात चंद्राच्या कक्षेत फिरणारे ऑरबिटर होते. पण चंद्राच्या पृष्ठभागावर फिरून संशोधन करणारे रोव्हर त्यावेळी नव्हते. यावेळी मात्र या यानाचे रोव्हर थेट चंद्रावर उतरणार आहे. आता चांद्रयान-२ मोहिमेमधलं रोव्हर जेव्हा चंद्राच्या दक्षिण ध्रुवावर उतरेल तेव्हा चंद्राची आणखी रहस्य उलगडता येतील.