सिम खरेदीसाठी ‘आधार’सक्ती नाही

नवी दिल्ली : सिम कार्डसाठी ओळखपत्र म्हणून मोबाईल ऑपरेटर कंपनी ड्रायव्हिंग लायसन्स, पासपोर्ट किंवा मतदार कार्ड या पर्यायांचाही स्वीकार करु शकतात, असे केंद्र सरकारनं स्पष्ट केले आहे. मोबाइल कंपनींनी त्वरित या आदेशाची अंमलबजावणी करावी, असंही टेलिकॉम सचिव अरुण सुंदराजन यांनी सांगितले आहे. फक्त आधार कार्ड नाही, या कारणामुळे ग्राहकाला सिम कार्ड देण्यास मनाई करता येणार नाही.

केवायसी फॉर्म भरताना ओळखपत्र म्हणून इतरही पर्याय स्वीकारण्यास हरकत नसल्याचं कोर्टाने सांगितलं आहे. सिम आधारशी लिंक करण्याचे आदेश कधी दिले नसल्याचं सुप्रीम कोर्टाने सांगितलं होतं. आधार कार्ड नसल्यामुळे देशातील नागरिकांप्रमाणे एनआरआयनाही त्रास झाला. आधार कार्डधारक नसलेल्या एनआरआयना सिम घ्यायला जाताना आधार कार्डाची मागणी केली जात होती. मात्र आता ही अट सरकारकडून शिथील करण्यात आली आहे.