नव्या सरकारचे अर्थसंकल्पीय अधिवेशन जुलैमध्ये

नवी दिल्ली: भाजपाच्या नेतृत्वाखाली एनडीएने लोकसभा निवडणुकीत दणदणीत विजय मिळवल्यानंतर आता दिल्लीत दुसऱ्यांदा सत्तेत येणाऱ्या मोदी सरकारच्या पहिल्या अधिवेशनाच्या हालचाली सुरू झाल्या आहेत. नव्या सरकारचे पहिले अधिवेशन 5 ते 15 जून दरम्यान होण्याची शक्यता आहे. तर जुलै महिन्यात मोदी सरकार-2 आपला पहिला पूर्ण अर्थसंकल्प सादर करेल, असे सांगण्यात येत आहे. या अधिवेशनात सरकार अनेक महत्त्वपूर्ण घोषणा करण्याची शक्यता आहे.

नरेंद्र मोदी 30 मे रोजी दुसऱ्यांदा पंतप्रधानपदाची शपथ घेणार आहे. यावेळी काही मंत्रीदेखील त्यांच्यासोबत शपथ घेऊ शकतात. यानंतर आठवड्याभरात राष्ट्रपतींच्या अभिभाषणाने संसदेच्या अधिवेशनाला सुरुवात होईल. या अधिवेशनात नवनिर्वाचित खासदारांना शपथ दिली जाईल. मोदी सरकार-2 जुलैमध्ये आपला पहिला पूर्ण अर्थसंकल्प सादर करण्याची शक्यता आहे. भाजपाने लोकसभा निवडणुकीपूर्वी प्रसिद्ध केलेल्या संकल्पपत्रात अनेक महत्त्वपूर्ण आश्वासनं दिली होती. त्यांची घोषणा अर्थसंकल्पातून केली जाऊ शकते. अल्प भूधारक शेतकऱ्यांना, लहान दुकानदारांना निवृत्ती वेतन, जीएसटीच्या टप्प्यात महत्त्वाचे बदल, सर्वांना कर्जमाफी योजना अशा महत्त्वपूर्ण घोषणा या अर्थसंकल्पातून केल्या जाऊ शकतात.