मोदींच्या तामिळनाडू दौऱ्याला विरोध; सोशल मिडीयावरून गो-बॅकची घोषणा

मदुराई – पंतप्रधान नरेंद्र मोदी आज २७ जानेवारी रोजी तामिळनाडुतील मदुराई दौऱ्यावर जात आहेत. येथे ऑल इंडिया इंस्टीट्युट ऑफ मेडिकल सायन्सच्या (एआयआयएमएस) इमारतीच्या पायाभरणीचा शुभारंभ करण्यासाठी मोदी थोप्पुरला भेट देणार आहेत. त्या पार्श्वभूमीवर ट्विटवर गो बॅक मोदी #GoBackModi हा हॅशटॅग ट्रेंड करत आहे. नेटीझन्सकडून ट्विटवरुन मोदींविरोधात एल्गार पुकारण्यात आला आहे.

तामिळनाडूतील मोदींच्या दौऱ्याला काही स्थानिक नागरिक, विरोधी पक्षातील नेते आणि डाव्या पक्षांचा विरोध आहे. थुटुकुंडी येथील पोलिसांचा गोळीबार, गाजा रिलिफ फंड याबाबत मोदींना प्रश्न विचारण्यात येत आहेत. यापूर्वीही एप्रिल २०१८ मध्ये मोदी तामिळनाडूच्या दौऱ्यावर असताना अशाचा विरोधाचा सामना मोदींना करावा लागला होता. त्यावेळीही विरोधकर्ते काळे झेंडे घेऊन मोदींविरोधात रस्त्यावर उतरले होते. दरम्यान, गो बॅक मोदी हा हॅशटॅग ट्रेंड झाल्यानंतर, मोदी समर्थकांनीही #TNWelcomesModi असा ट्रेंड ट्विटरवर सुरू केला असून तोही #GoBackModi च्या खालोखाल ट्रेंड करत आहे.