३ दिवसांवर परीक्षा असतांना एमपीएससीची परीक्षा पुढे ढकलली; राज्यभरात संताप
मुंबई: कोरोनामुळे एमपीएससीची परीक्षा वर्षभरापासून झालेल्या नाहीत. १४ मार्चला राज्यसेवेची परीक्षा होणार होती. मात्र परीक्षा तीन दिवसांवर असतांना परीक्षा स्थगित करण्यात आली आहे. कोरोणाचा पार्श्वभूमीवर ही परीक्षा स्थगित करण्यात आली आहे. सरकारने घेतलेल्या या निर्णयामुळे संपूर्ण राज्यात एमपीएससीची तयारी करणाऱ्या विद्यार्थ्यांमध्ये संताप व्यक्त होत आहे. पुण्यात विद्यार्थ्यांचे आंदोलन सुरु आहे.
एमपीएससीने परिपत्रक काढून परीक्षा पुढे ढकलण्यात येत असल्याचे जाहीर करण्यात आले आहे. परीक्षेच्या नव्या तारखा यथावकाश जाहीर करण्यात येतील, असं देखील या पत्रकामध्ये म्हटलं आहे. त्यामुळे एमपीएससीच्या उमेदवारांची परीक्षेसाठीची प्रतिक्षा अद्याप संपत नसल्याचीच परिस्थिती निर्माण झाली आहे.
विद्यार्थी अनेक वर्षांपासून परीक्षेची तयारी करत आहेत. मात्र वर्षभरापासून परीक्षा होत नसल्याने विद्यार्थी चिंतेत आहेत. त्यात आता पुन्हा परीक्षा पुढे ढकलण्यात आल्याने विद्यार्थी अधिक आक्रमक झाले आहेत. पुण्यात भाजपचे आमदार गोपीचंद पडळकर यांच्या उपस्थितीत आंदोलन होत आहे.
येत्या १४ मार्च रोजी एमपीएससीची मार्च २०२० मध्ये होणारी पूर्वपरीक्षा होणार होती. त्यासाठी सर्व तयारी देखील पूर्ण झाली होती. उमेदवारांना प्रवेशपत्र देखील देण्यात आले होते. आता परीक्षेच्या अवघ्या ३ दिवसांआधी परीक्षा पुढे ढकलण्यात आल्याचा निर्णय घेण्यात आल्यामुळे आता उमेदवारांकडून याविषयी तीव्र संताप व्यक्त करण्यात येत आहे.
मागील वर्षी मार्च महिन्यामध्ये होणाऱ्या एमपीएससीच्या पूर्व परीक्षा करोनाच्या संकटामुळे पुढे ढकलण्यात आल्या होत्या. करोनाचा ज्वर काहीसा कमी झाल्यानंतर ऑक्टोबर महिन्यात त्या घेण्याचं ठरलं. उमेदवारांनी तयारी देखील सुरू केली. ११ ऑक्टोबर तारीख ठरली. पण मराठा आरक्षणाचा मुद्दा प्रलंबितच असल्यामुळे ती पुढे ढकलण्याची मागणी मराठा समाजाकडून करण्यात आली होती. त्यासाठी आक्रमक भूमिका देखील घेतली होती. त्यामुळे ही परीक्षा पुढे ढकलण्यात आली. त्यानंतर १ नोव्हेंबरला होणाऱ्या महाराष्ट्र अभियांत्रिकी सेवा पूर्व परीक्षा आणि २२ नोव्हेंबरला होणाऱ्या दुय्यम सेवा अराजपत्रित गट ब संयुक्त पूर्व परीक्षा देखील पुढे ढकलण्यात आल्या होत्या. आता पुन्हा परीक्षा पुढे ढकलण्यात आल्यामुळे परीक्षार्थी उमेदवारांमध्ये प्रचंड असंतोषाचं वातावरण आहे.