कर्नाटकच्या विजयाचा मुंबई भाजप कार्यालयात जल्लोष

मुंबई:- कर्नाटकमध्ये काँग्रेसला धूळ चारत मोठ्या प्रमाणावर जागा जिंकल्यानंतर देशभर विजयाचा आनंदोत्सव साजरा केला जात आहे. मुंबईत देखील भाजप प्रदेश कार्यालयात  भाजप प्रदेशाध्यक्ष रावसाहेब दानवे, जलसंपदा मंत्री गिरीश महाजन मुंबई प्रदेश अध्यक्ष आशिष शेलार यांच्यासह अनेक भाजप आमदार व शेकडो कार्यकर्त्यांनी भाजपच्या कार्यालयासमोर ढोल-ताशे वाजवून आणि एकमेकांना पेढे भरवून आनंदोत्सव साजरा केला. यावेळी महिला नेत्या आणि कार्यकर्त्यांनी फूगडी खेळून विजयाचा आनंदोत्सव साजरा केला आणि हर हर मोदी घर घर मोदीच्या घोषणा देखील  दिल्या. सकाळपासूनच भाजप कार्यालयात मोठ्या स्क्रिनवर निकालाचे अपडेट दिले जात होते. निकाल जसजसे भाजपच्या बाजूने येत होते तसतसे भाजप कार्यकर्त्यांच्या आनंदाला उधान येत होते. निकाल आपल्या बाजूने स्पष्ट दिसायला लागल्यांनंतर  भाजप पदाधिकारी आणि कार्यकर्त्यांनी कार्यालयासमोर फटाके फोडून आनंद साजरा केला.