केसीईच्या शिक्षण व शारीरिक शिक्षणशास्त्र महाविद्यालयाचे गुरूवारी नामकरण

जळगाव, प्रतिनिधी –

खान्देश कॉलेज एज्युकेशन सोसायटीच्या शिक्षण आणि शारीरिक शिक्षणशास्त्र महाविद्यालयाचा नामकरण सोहळा गुरुवारी (२२ फेब्रुवारी) दुपारी ४ वाजता महाविद्यालयाच्या क्रीडांगणावर होणार आहे. या महाविद्यालयाचे नाव ‘व. पु. होले शिक्षणशास्त्र आणि शारीरिक शिक्षणशास्त्र महाविद्यालय’ असे राहील, अशी माहिती प्राचार्य डॉ. अशोक राणे यांनी पत्रकार परिषदेत दिली. या कार्यक्रमासाठी के.सी.ई.सोसायटीचे अध्यक्ष नंदकुमार बेंडाळे यांचे विशेष सहकार्य मिळत असल्याचे डाॅ. राणे यांनी सांगितले.
या नामकरण सोहळ्याला प्रमुख अतिथी म्हणून नवी दिल्ली येथील एन.सी.टी.ई. वेस्टर्न रिजनल कमिटीचे सदस्य आणि यवतमाळ येथील शासकीय अध्यापक महाविद्यालयाचे प्राचार्य डॉ.सुहासकुमार आर.पाटील उपस्थित राहतील. प्रा. वसंतराव पुरुषोत्तम होले आणि रजनी वसंतराव होले या सत्कारमूर्ती असून कार्यक्रमाच्या अध्यक्षस्थान कवयित्री बहिणाबाई चौधरी उत्तर महाराष्ट्र विद्यापीठाचे कुलगुरू व्ही.एल. माहेश्वरी भुषविणार असल्याचे प्राचार्य राणे यांनी सांगितले. संस्थेच्या चौफेर होत असलेल्या विस्ताराची माहिती प्राचार्य राणे यांनी दिली. याप्रसंगी शारीरिक शिक्षणशास्त्र विभागाचे प्रमुख डॉ.निलेश जोशी, प्रा. डाॅ.केतन चौधरी, मोहन चौधरी उपस्थित होते.
सत्कार मूर्ती प्रा.व.पु.होले यांच्या कार्याची माहिती प्राचार्य राणे यांनी दिली. प्रा. होले यांनी सावदा येथील ना.गो.पाटील कनिष्ठ महाविद्यालयात जीवशास्त्र विषयाचे प्राध्यापक म्हणून सेवा दिली. त्यांनी ३५ वर्ष ज्ञानदानाचे कार्य केले. ते एन.सी.सी.चे माजी अधिकारी आहेत. के.सी. ई.सोसायटीचे सदस्य व एज्युकेशन युनियन जळगावचे सचिव म्हणून देखील ते कार्यरत आहेत. त्यांनी स्वलिखित कथाकथनाचे १२०५ कार्यक्रम यशस्वीरीत्या केले. विविध वृत्तपत्रात अनेक विषयांवर स्तंभ लेखनही त्यांनी केले. समाजातील अनिष्ठ, वाईट, कालबाह्य रूढी, परंपरा, अंधश्रद्धेवर प्रहार केला. अनेक गरीब, गरजू विद्यार्थ्यांना उच्चशिक्षणासाठी आर्थिक मदत व मार्गदर्शन केले. ते उत्तम व्याख्याते असून अनेक नाटकांमध्ये स्वतः भूमिका, नाट्य दिग्दर्शन प्रा. होले यांनी केले असल्याचे प्राचार्य राणे यांनी सांगितले. खान्देशातील खाद्यसंस्कृती, सण, उत्सवां संदर्भात लेखन केले. पाणी आडवा, पाणी जिरवा, वृक्षारोपण, अध्यात्मिक क्षेत्रातही प्रा. होले यांचे भरीव कार्य असून अत्यंत निर्मळ, निस्वार्थी, निश्र्चयी व्यक्तिमत्त्वाचे धनी असलेल्या प्रा. होले यांनी व्रतस्थ भावनेने समाजाला देण्याचा वसा जोपासला आहे. त्यांच्या या व्यापक कार्याला त्यांची सहचारिणी रजनी होले यांचे मोलाचे सहकार्य लाभत असल्याचे प्राचार्य राणे यांनी सांगितले.