बच्चन कुटुंबीय राजस्थान रॉयल्स संघ विकत घेण्याच्या तयारीत

मुंबई : बॉलिवूडचे महानायक अमिताभ बच्चन आणि त्यांचे सुपुत्र अभिनेते अभिषेक बच्चन यांचे खेळाविषयी विशेष प्रेम आहे. प्रो कबड्डी व इंडियन सुपर फुटबॉल लीगमधील संघांत बच्चन कुटुंबीयांचे मालकी हक्क आहेत. दरम्यान आयपीएलमधील राजस्थान रॉयल्स संघाचे मालकी हक्क विकत घेण्याच्या तयारीत बच्चन कुटुंबीय असल्याचे बोलले जात आहे. तसा दावा एका इंग्रजी दैनिकाने केला आहे.

बच्चन कुटुंबीयांनी सुरुवातीला चेन्नई सुपर किंग्जच्या मालकी हक्कासाठी प्रयत्न केले होते, परंतु त्यानंतर त्यांनी एक वेळेचा विजेत्या राजस्थान रॉयल्सकडे मोर्चा वळवला. अभिषेक बच्चनने काही दिवसांपूर्वी मनोज बदले यांची लंडन येथे भेट घेतली,अशी माहिती एबी कोर्पचे सीईओ रमेश पुलापाका यांनी दिली.

बच्चन कुटुंबीयांनी रॉयल्सची मालकी हक्क खरेदी केल्यात ते दुसरे बॉलिवूड सेलेब्रिटी ठरणार आहेत. याआधी शिल्पा शेट्टी आणि तिचा पती राज कुंद्रा यांच्याकडे रॉयल्सचे मालकी हक्क होते. सध्या बच्चन कुटुंबीयांकडे आयएसएलमधील चेन्नईयन एफसी आणि प्रो कबड्डी लीगमधील जयपूर पिंक पँथर्स यांची मालकी आहे.