नोबेल विजेते अभिजीत बॅनर्जी मोदींची घेणार भेट !

नवी दिल्ली: यंदाचा अर्थशास्त्रातील नोबेल पुरस्कार जिंकणारे भारतीय वंशाचे अमेरिकी अर्थतज्ज्ञ अभिजीत बॅनर्जी आज मंगळवारी पंतप्रधान नरेंद्र मोदी यांची दिल्लीतील निवासस्थानी भेट घेणार आहेत. नुकतेच बॅनर्जी यांनी देशाची अर्थव्यवस्था अडचणीत असल्याचे म्हटले होते. त्यावरुन भाजपाने त्यांच्यावर डाव्या विचारांचे असल्याचे आरोप केले होते. दरम्यान अभिजीत बॅनर्जी यांच्या भेटीकडे सर्वांचे लक्ष लागले आहे.

अभिजीत बॅनर्जी हे एक असे अर्थतज्ज्ञ आहेत ज्यांनी काँग्रेसला २०१९ च्या लोकसभा निवडणुकीदरम्यान ‘न्याय योजना’ हा वचननामा तयार करण्यासाठी मदत केली होती. या योजनेद्वारे तत्कालीन काँग्रेस अध्यक्ष राहुल गांधी यांनी गरीब जनतेला किमान वेतन सहाय्याची घोषणा केली होती.

‘जागतिक दारिद्रय़ निमूर्लनासाठी प्रायोगिक दृष्टिकोन’ या विषयावरील संशोधनासाठी भारतीय वंशाचे अमेरिकी अर्थशास्त्रज्ञ अभिजित बॅनर्जी, त्यांच्या पत्नी एस्तेर डफलो आणि मायकेल क्रेमर यांना यंदाचे अर्थशास्त्राचे नोबेल जाहीर झाले आहे.