पश्चिम बंगालमध्ये अमित शहांच्या सभेला आणि हेलीकॉप्टर लँडिंगला परवानगी नाकारली
मुंबई: लोकसभा निवडणुकीच्या शेवटच्या सातव्‍या टप्यासाठी १९ मे रोजी मतदान होणार आहे. त्यातच पश्चिम बंगालमधील राजकरण तापत आले. भाजपचे राष्ट्रीय अध्‍यक्ष अमित शहा यांच्‍या पश्चिम बंगालमधील जाधवपूर येथील सभेला आणि हेलीकॉप्टर लँड करण्‍यास परवानगी नाकारली आहे.
अमित शहा जाधवपूर येथे आज रोड शो करणार होते. मात्र त्‍यांच्‍या या रोड शोस परवानगी देण्‍यात आली नसल्याची माहिती भाजपने दिली आहे. सुरक्षेचे कारण सांगत ही परवानगी नाकारण्यात आली असल्याचे बोलले जात आहे. याआधी देखील ममता बॅनर्जी यांनी भाजप नेत्‍यांच्‍या सुरक्षेचे कारण सांगत रोड शो करण्‍यास व हेलिकॉप्‍टर लँडिंगला परवानगी नाकारली होती. यापूर्वी २२ फेब्रुवारीला ममता बॅनर्जी यांनी अमित शहा यांच्‍या मालदा येथील रॅलीच्‍या दरम्‍यान त्‍यांच्‍या हेलीकॉप्टर लँडिगला परवानगी नाकारली होती. भाजपकडून मोठ्या प्रमाणात टीका झाल्यानंतर मात्र , ममता यांनी यासाठी परवानगी दिली होती. अमित शहा आज पश्चिम बंगालच्‍या दौर्‍यावर आहेत. पश्चिम बंगालमधील तीन ठिकाणी त्‍यांच्‍या सभा आयोजित केल्‍या आहेत. अमित शहा यांची जयनगर,जाधवपूर व बरासत या तीन लोकसभा मतदारसंघात सभा होणार होत्या.