नकली सोने खरे असल्याचे भासवून एकाची फसवणूक;पोलिसांनी दोघांना घेतले ताब्यात

भुसावळ प्रतिनिधी ।

शहरातील शिरपूर कन्हाळा रोडवरील वर्ल्ड स्कूलचे बाजुला रोडवर काही इसम बनावट सोने खरे असल्याचे भासवून एकाची फसवणूक करताना आढळले. त्या दोघांना पोलिसांनी ताब्यात घेतले. उपविभागीय पोलीस अधिकारी सोमनाथ वाघचौरे यांना याबाबत माहिती मिळाल्याने पथक तयार करून घटनास्थळी रवाना केले. पथक (दि. २९) ५.१५ वाजता शिरपूर – कन्हाळा रोडवरील वर्ल्ड स्कूलचे बाजुला रोडवर सार्वजनिक जागी सापळा रचून होते. काहीवेळेनंतर संबंधित आरोपी किसनलाल दौलतराम बागरी (वय ३६, रा. बल्लूर ता. जि. सिरोही राजस्थान), बाबुलाल ओबाराम बागरी (वय ४२, रा. लक्ष्मी नगर बिबलसर, ता. जि. जालोद राजस्थान ) हे स्वतःचे फायद्यासाठी त्यांचे जवळील सोन्याचे दागिने मण्याची माळ हे नकली असल्याचे माहित असुन सुध्दा स्वतःचे ताब्यात बाळगुन अप्रामाणिकपणे ते खरे असल्याचे भासवून भुसावळ येथील एकास विक्री करून त्यांची फसवणूक केली. पोना. रमण सुरळकर यांच्या फिर्यादीवरून गुन्हा दाखल केला आहे. ही कारवाई उपविभागीय पोलीस अधिकारी सोमनाथ वाघचौरे यांच्या मार्गदर्शनाखाली पोहेकॉ सूरज पाटील, पोना. यासिन पिंजारी, रमण सुरळकर अशांनी मिळून केली.