इम्रान खान यांच्या शपथविधीला मोदी जाणार?

नवी दिल्ली-पाकिस्तानच्या सार्वत्रिक निवडणुकीत माजी क्रिकेटपटू इम्रान खान यांच्या तेहरीक-ए-इन्साफ हा पक्ष सर्वात मोठा पक्ष ठरला असल्याने इम्रान खान पंतप्रधान होणार आहे. ते शपथविधीसाठी पंतप्रधान नरेंद्र मोदींना निमंत्रण देण्याचा तयारीत आहे. शपथविधीसाठी सार्क देशांच्या सर्व नेत्यांना निमंत्रण देण्यात येणार असून यामध्ये नरेंद्र मोदींच्या नावाचाही समावेश आहे.

नुकत्याच पार पडलेल्या सार्वत्रिक निवडणुकीत इम्रान खान यांचा पक्ष सर्वात मोठा पक्ष म्हणून समोर आला आहे. मात्र सरकार स्थापन करण्यासाठी त्यांच्याकडे बहुमत नाही आहे. दरम्यान इम्रान खान यांनी ११ ऑगस्ट रोजी आपण पंतप्रधानपदाची शपथ घेणार असल्याचे जाहीर केलं आहे.

पंतप्रधान नरेंद्र मोदी यांनी पाकिस्तानच्या पंतप्रधानपदी विराजमान होण्यासाठी सज्ज झालेले इम्रान खान यांच्याशी सोमवारी फोनवरुन संवाद साधला. तसेच यावेळी त्यांनी शांती आणि विकासावर चर्चा केली.

पाकिस्तानच्या सार्वत्रिक निवडणुकीमध्ये इम्रान खान यांच्या पाकिस्तान तहरिक-ए-इन्साफ पक्षाने सर्वाधिक जागा ११६ जागा मिळाल्या मिळविल्या असल्या तरी हा पक्ष बहुमतापासून अद्यापि दूर आहे. इम्रान खान यांनी पाच जागांवर निवडणूक लढविली आणि ते निवडूनही आले आहेत. त्यामुळे त्यांना चार जागा सोडाव्या लागणार असल्याने त्यांच्या पक्षाच्या अडचणींमध्ये भरच पडणार आहे. पक्षाला पूर्ण बहुमत नसल्याने लहान पक्षांच्या पाठिंब्यावर त्यांचे सरकार स्थापन होणार असून अपक्ष व लहान पक्ष यांच्याशी वाटाघाटी सुरू आहेत.