पालो अल्टो नेटवर्कच्या सीईओपदी निकेश अरोरा; पगार पाहून व्हाल थक्क

मुंबई : निकेश अरोरा यांची पालो अल्टो नेटवर्क या सायबर सिक्युरिटी फर्मच्या मुख्य कार्यकारी अधिकारीपददी निवड करण्यात आली आहे. अरोरा यांना पालो अल्टो नेटवर्ककडून १२.८ कोटी डॉलरचे (सुमारे ८५८ कोटी रुपये) पॅकेज देण्यात आले आहे. जगात सर्वाधिक पगार घेणाऱ्या सीईओंच्या यादीत अरोरा यांचे नाव दाखल झाले आहे.

५० वर्षीय निकेश अरोरा यांची मार्क मिकलॉकलीन यांच्या जागी नियुक्ती झाली आहे. मिकलॉकलीन हे गेल्या सात वर्षांपासून पालो अल्टो नेटवर्कच्या सीईओपदावर होते. सीईओपदासह निकेश अरोरा हे पालो अल्टो नेटवर्कचे प्रेसिडंटही असतील. त्यामुळे मिकलॉकलीन यापुढे पालो अल्टो नेटवर्कचे व्हाईस चेअरमन म्हणून कंपनीशी जोडलेले असतील.

६.७ कोटी रुपये पगार
१२.८ कोटी डॉलर पॅकेज असणारे निकेश अरोरा यांचे पॅकेज हे ‘अॅपल’चे सीईओ टीम कूक यांच्या पॅकेजएवढे झाले आहे. त्यामुळे निकेश अरोरा हे आता टीम कूक (अॅपल) आणि बॉब लेजर (वॉल्ट डिज्नी) यांच्या रांगेत जाऊन बसले आहेत. निकेश अरोरा यांना वर्षिक १ मिलियन डॉलर म्हणजे जवळपास ६.७ कोटी रुपये पगार असेल. एवढेच नव्हे, अरोरा यांना बोनसही मिळणार आहे. त्याचसोबत, अरोरांना २६८ कोटींचे रिस्ट्रिक्टेड शेअरही मिळतील. मात्र हे शेअर ते सात वर्षांपर्यंत विक्री करु शकत नाहीत.

गूगलसोबत केले काम
ब्लूमबर्गच्या रिपोर्टनुसार, निकेश अरोरांना देण्यात आलेले पालो अल्टो नेटवर्कचे शेअर पुढल्या १५० टक्के वाढल्यास, त्यांना ४४२ कोटी रुपये मिळतील. अरोरा हे पालो अल्टो नेटवर्कचे १३४ कोटींपर्यंत शेअर खरेदी करु शकतात. निकेश अरोरा यांनी याआधीही जायंट कंपन्यांसोबत काम केले आहे. २००४ साली अरोरांनी इंटरनेट जगतातील जायंट असलेल्या गूगलसोबत काम करण्यास सुरुवात केली.

गूगलमधील अनेक महत्त्वाच्या कामगिरींचे ते मुख्य होते. २००४ ते २००७ या कालावधीत अरोरा गूगलचे युरोप ऑपरेशनचे व्हॉईस प्रेसिंडत होते. त्यानंतर आफ्रिका रिजनसाठी त्यांनी २००९ पर्यंत काम केले. 2009 ते 2010 या काळात गूगलचे ग्लोबल बिझनेस डेव्हलपमेंटचे प्रेसिडंट राहिले. २०११ मध्ये गूगलमध्ये चीफ बिझनेस ऑफिसर बनले आणि त्यानंतर २०१४ मध्ये अरोरा यांनी गूगलला राम राम ठोकला.

त्यानंतर निकेश अरोरा हे सॉफ्ट बँकेचे सीओओ म्हणून जॉईन झाले होते. २०१६ पर्यंत सॉफ्ट बँकेत त्यांनी काम केले. आता जून २०१८ मध्ये पालो अल्टो नेटवर्कसोबत काम सुरु केले आहे. निकेश अरोरा यांचा जन्म ६ फेब्रुवारी १९६८ रोजी उत्तर प्रदेशातील गाजियाबाद येथे झाला. निकेश यांचे वडील भारतीय वायूदलात अधिकारी होते. दिल्लीतील एअरफोर्सच्या शाळेत अरोरो यांचं शिक्षण झालं. पुढे इलेक्ट्रिक इंजिनिअरिंग आयआयटी वाराणसीमधून १९८९ साली पूर्ण केली. आयआयटीच्या पदीवनंतर त्यांना विप्रोत नोकरी मिळाली. मात्र त्यांना लवकरच नोकरी सोडली आणि पुढील शिक्षणासाठी अमेरिकेतील बोस्टन विद्यापीठात दाखल झाले. त्यांतर अमेरिका नॉर्थ-ईस्टर्न यूनिव्हर्सिटीतून एमबीएची पदवी मिळवली.