पोटनिवडणुकीसाठी पतंगराव कदम यांच्या मुलाने दाखल केली उमेदवारी

सांगली: पलूस-कडेगाव विधानसभा पोटनिवडणुकीसाठी, काँगेसकडून दिवंगत पतंगराव कदम यांचा मुलगा विश्वजित कदम यांनी आज उमेदवारी अर्ज भरला. पतंगराव कदम यांच्या निधनाने रिक्त झालेल्या या जागी त्यांच्या मुलालाच उमेदवारी देण्यात आली आहे. यावेळी काँगेसकडून माजी मुख्यमंत्री पृथीराज चव्हाण, सतेज पाटील, हर्षवर्धन पाटील, आमदार मोहनराव कदम, आमदार सुमनताई पाटील, आमदार निरंजन डावखरे, कै. पतंगराव कदम यांच्या पत्नी विजयमाला कदम यांच्या उपस्थितीत अर्ज दाखल करण्यात आला.

उपविभागीय अधिकारी तथा दंडाधिकारी, कडेगाव यांच्याकडे हा अर्ज दाखल करण्यात आला. यावेळी विश्वजित कदम आणि काँग्रेसच्या हजारो कार्यकर्त्यांनी तहसिल कार्यलयात गर्दी केली होती. या पोटनिवडणुकीसाठी राष्ट्रवादी काँग्रेसने काँग्रेसला पाठींबा दर्शवला आहे. त्यामुळे भाजप या पोटनिवडणुकीसाठी उमेदवार देणार का, हे पाहणे महत्वाचे ठरणार आहे.

ज्येष्ठ नेते पतंगराव कदम यांच्या निधनामुळे इथे पोटनिवडणूक होत आहे. त्यामुळे भाजपने उमेदवार न देता, ही निवडणूक बिनविरोध होऊ द्यावी, अशी विनंती आम्ही करणार आहोत”, असं हर्षवर्धन पाटील यांनी सांगितले. पलूस-कडेगाव पोटनिवडणुकीसाठी 28 मे रोजी मतदान तर 31 मे रोजी मतमोजणी होणार आहे.