अखेर आज मोदींचा वेगळा रूप दिसणार; मॅन व्हर्सेस वाईल्डचे प्रसारण !

मुंबई : पंतप्रधान नरेंद्र मोदी यांचा वेगळाच रूप दाखविणारा मॅन व्हर्सेस वाईल्ड या कार्यक्रमाचा खास भागांचे आज सोमवारी १२ ऑगस्टला प्रसारण होत आहे. उत्तराखंडमध्ये असणाऱ्या जिम कॉर्बेट राष्ट्रीय उद्यानात मोदी आणि बेअर यांच्यासोबत एका थरारक अशा सफरीचा अनुभव प्रेक्षकांना आज येणार आहे. विशेष म्हणजे हा कार्यक्रम मराठी भाषेत देखील पाहायला मिळणार आहे.

बेअरसोबत या कार्यक्रमादरम्यान मोदी वन्यजीव संवर्धनाच्या मुद्यावर काही खास मुद्दे मांडणार आहेत, ज्यामध्ये बेअरचेही विचार सर्वांपर्यंत पोहोचणार आहेत. सोशल मीडियावर काही दिवसांपूर्वीच या खास भागाचे प्रोमो प्रदर्शित करण्यात आले होते. ज्यानंतर सर्वत्र या खास भागाचीच चर्चा झाली. साऱ्या विश्वात डिस्कव्हरी इंडिया वाहिनीवर हा खास भाग दाखवण्यात येणार आहे. तुम्ही भारतात असाल तर, केबल आणि डिश टीव्ही नेटव्हर्कच्या सहाय्याने तुम्ही हा कार्यक्रम पाहू शकता. भारताबाहेर असणारेही हा भाग डिस्कव्हरी वाहिनीवर पाहू शकतात.

भारतीय प्रमाणवेळेनुसार रात्री ९ वाजचा हा कार्यक्रम सुरु होणार आहे. इंग्रजी, हिंदी, बंगाली, तामिळ, तेलुगू, कन्नड, मराठी, मल्याळम अशा आठ भाषांमध्ये हा कार्यक्रम पाहता येणार आहे. जो एकाच वेळी डिस्कव्हरीच्या १२ वाहिन्यांवर दाखवण्यात येणार आहे. यामध्ये डिस्कव्हरी, डिस्कव्हरी, एचडी वर्ल्ड, ऍनिमल प्लॅनेट, ऍनिमल प्लॅनेट एचडी वर्ल्ड, टीएलसी, टीएलसी एचडी वर्ल्ड, जीत, जीत प्राईम एचडी, डिस्कव्हरी सायन्स, डिस्कव्हरी टर्बो, डिस्कव्हरी किड्स अशा वाहिन्यांच्या माध्यमातून प्रेक्षकांना पाहता येणार आहे. नेटफ्लिक्स आणि पीएमओच्या अधिकृत सोशल मीडिया अकाऊंटवरुनही हा भाग प्रसारित होणार आहे. पण, यासंदर्भातील तारखा अद्यापही जाहीर करण्यात आलेली नाही.