‘पीएम नरेंद्र मोदी’ चित्रपटाला धक्का; ट्रेलर युट्युबवरून हटविले

नवी दिल्ली:पंतप्रधान नरेंद्र मोदी यांच्या जीवनावरील ‘पीएम नरेंद्र मोदी’ हा बायोपिक सध्या चर्चेत आहे. या चित्रपटाची घोषणा झाल्यापासूनच हा चित्रपट चांगलाच वादात अडकला आहे. लोकसभा निवडणूक सुरु असल्याने हा चित्रपट प्रदर्शित करू नका अशी मागणी विरोधकांनी केली आहे. त्यामुळे या चित्रपटाच्या प्रदर्शनावर निवडणूक आयोगाने स्थगिती आणली आहे. त्यामुळे आता हा चित्रपट कधी प्रदर्शित होणार याबाबत सांगणे खूपच कठीण आहे. हा चित्रपट प्रदर्शित होत नसल्याचा या चित्रपटाच्या टीमला चांगलाच धक्का बसला होता. आता तर या चित्रपटाचा ट्रेलरच युट्युबवरून काढण्यात आला आहे. या चित्रपटाचा ट्रेलर मार्चमध्ये प्रदर्शित करण्यात आला होता. हा ट्रेलर लाखोहून अधिक लोकांनी पाहिला होता. हा ट्रेलर दमदार असल्याचे अनेकांचे म्हणणे होते. पण आता हा ट्रेलर युट्युबवरून गायब झाला आहे.

मोदी बायोपिक ट्रेलर असे टाइप केल्यानंतर हा व्हिडिओ उपलब्ध नसल्याचे सांगण्यात येत आहे. या ट्रेलरला निवडणूक आयोगाकडून बंदी घालण्यात आली आहे का हे जाणून घ्यायला प्रेक्षक उत्सुक आहेत.

पीएम नरेंद्र मोदी या चित्रपटात नरेंद्र मोदी यांच्या भूमिकेत अभिनेता विवेक ऑबेरॉय दिसणार आहे. या चित्रपटाची निर्मिती आनंद पंडीत यांनी केली आहे. आनंद पंडीत केवळ निर्माते म्हणूनच नाही तर वितरक म्हणूनही भूमिका बजावत आहेत. त्यांनी पीएम नरेंद्र मोदी बायोपिक केवळ भारतातच नाही, तर इतर देशांतही प्रदर्शित करण्याची योजना आखली होती. मात्र ती योजना निवडणूक आयोगाच्या या निर्णयामुळे निर्मात्यांसमोर पुन्हा एकदा प्रश्नचिन्ह निर्माण झाले आहे. या चित्रपटात विवेकसोबतच झहीरा वहाब, बोमन इराणी आणि मनोज जोशी महत्त्वाच्या भूमिकेत आहेत.