पोलीस ठाण्यात महिला बसली १८ तास ताटकळत
उस्मानाबाद : शिक्षणाधिकाऱ्याविरोधात तक्रार देण्यासाठी गेलेल्या महिलेला पोलिसांनी 18 तास ताटकळत बसवून ठेवल्याची घटना घडली आहे. उस्मानाबादमधील या प्रकाराची वरिष्ठ पातळीवर दखल घेण्यात आली असून पोलीस निरीक्षकाची उलबांगडी करण्यात आली आहे. शहरातील आनंदनगर पोलीस स्टेशनचे पोलीस निरीक्षक डी. बी. घात यांची उचलबांगडी करण्यात आली आहे. शिवाय अन्य कर्मचारी आणि अधिकाऱ्यांवरही खात्यांतर्गत कारवाई करण्यात येणार असल्याची माहिती पोलीस अधीक्षक पंकज देशमुख यांनी दिली.
शिक्षणाधिकारी सचिन जगताप यांच्याविरोधात तक्रार देण्यासाठी संबंधित महिला 10 एप्रिल रोजी आनंदनगर पोलीस ठाण्यात गेली होती. मात्र महिलेला 18 तास ताटकळत बसवून ठेवलं आणि गुन्हा दाखल करुन घेण्यास टाळाटाळ करण्यात आली. तपास अधिकारी दिवसभरात बदलत राहिले. शेवटी या महिलेने रात्री अडीच वाजता पोलीस मदत केंद्राला फोन केला. त्यानंतरही पोलिसांनी गुन्हा दाखल करून घेतला नाही. शेवटी कंटाळून दुसऱ्या दिवशी पहाटे पाच वाजता ही महिला निघून गेली.
सकाळी अकरा ते दुसऱ्या दिवशी पहाटे पाच वाजेपर्यंत महिलेला पोलीस स्टेशनला बसवून ठेवण्यात आले. पोलीस अधीक्षकांनी या घटनेच्या चौकशीचे आदेश दिले होते. या महिलेच्या मूळ तक्रारीवर तब्बल पाच दिवसांनंतर पोलीस स्टेशनला गुन्हा दाखल करण्यात आला होता. अखेर संबंधितांवर आज कारवाई करण्यात आली.