सोशल मीडियावर राखीचं सडेतोड उत्तर!

मुंबई: नेहमीच वादग्रस्त विधान करणारी बॉलिवूडची आयटम गर्ल म्हणजेच राखी सावंत बऱ्याच दिवसांपासून ती कोणत्या मोठ्या प्रोजेक्टमधून झळखली नसली तरीही तिच्याभोवती असणारी चर्चा आणि वादांचं वलय मात्र राखीला चर्चेत आणण्यास पुरेसं ठरतं. सध्याही ती अनेकांचं लक्ष वेधत आहे ते म्हणजे सोशल मीडियावर एका युजरला दिलेल्या उत्तरामुळे.

राखी इन्स्टाग्रामवर ऍक्टिव्ह असते आणि तिच्या प्रत्येक पोस्टवर अनेक कमेंट्सही येतात. ज्यामध्ये तुलनेने आक्षेपार्ह कमेंटचं प्रमाण जास्त असतं. याचविषयी राखीला एका युजरने प्रश्न विचारला ‘राखी मी नुकतच तुझ्या इन्स्टाग्राम पोस्टवरील कमेंट्स वाचल्या. ज्यामध्ये बऱ्याच आक्षेपार्ह कमेंट्स होत्या. तू या सर्व कमेंट्सचा सामना कशा प्रकारे करतेस?’, अशी कमेंट लिहिली.

प्रश्नाचं उत्तर देत राखीने लिहिलं, ‘मी ते वाचते, त्याकडे दुर्लक्ष करते आणि त्या कमेंट्स डिलीट करते. त्या सर्व आक्षेपार्ह कमेंट करणाऱ्या मंडळींना महिलांविषयी आदर नाही हेच यातून स्पष्ट होत आहे. ते अगदी वेंधळे आहेत.’ राखी सहसा तिच्या सोशल मीडियावर येणाऱ्या कमेंट्सकडे दुर्लक्ष करते खरी. पण, यावेळी मात्र तिने या कमेंटचं उत्तर देण्याचं ठरवत निंदा करणाऱ्यांमुळे किंवा आक्षेपार्ह कमेंट्स् करणाऱ्यांमुळे आपल्याला फारसा काहीच फरक पडत नसल्याचंच तिने स्पष्ट केलं.