2 हजारांच्या नोटांची छपाई बंद

नवी दिल्ली :- रिझर्व्ह बॅंक ऑफ इंडियाने २००० रुपयांच्या नोटांची छपाई थांबविली आहे. देशातील चलन तुटवड्याच्या पार्श्वभूमीवर आरबीआयने ५०० रुपयांच्या नोटांच्या छपाईवर भर दिला आहे. याबाबतची माहिती आर्थिक व्यवहार खात्याचे सचिव सुभाषचंद्र गर्ग यांनी दिली.

छोटे व्यवहार करण्याकरिता २००० हजार रुपयांच्या नोटांमध्ये अडचणी येतात. त्यामुळे कमी मूल्याच्या नोटा उपलब्ध करून देण्यासाठी सध्या दोन हजार रुपयांच्या नोटेची छपाई थांबविण्यात आली आहे. देशातील सामान्यपणे व्यवहारामध्ये ५००, २०० आणि १०० रुपयांच्या नोटांनी व्यवहार करणं सोयीस्कर जात असल्यामुळे आरबीआयने ५०० रुपयांच्या नोटांच्या छपाईवर भर दिला आहे. पाचशे रुपयांच्या चलनातील नोटांची छपाई दररोज तीन हजार कोटी रुपयांपर्यंत वाढविण्यात आली आली असल्याचेही गर्ग यांनी नमूद केले आहे. तसेच देशामध्ये नोटा पुरेशा प्रमाणात उपलब्ध असून, अतिरिक्त मागणीही पूर्ण केली जात आहे, असे गर्ग म्हणाले.

गेल्या आठवड्यात देशातील चलन पुरवठ्याचा आढावा घेण्यात आला. देशातील ८५ टक्के एटीएम सुरळीत असल्याचे दिसून आले आहे. एकूणच परिस्थिती पूर्वपदावर आली आहे, असंही गर्ग यांनी नमूद केले.सध्या दोन हजार रुपयांच्या सात लाख कोटी मूल्याच्या नोटा चलनात आहेत. हे प्रमाण पुरेसे आहे. त्यामुळे दोन हजार रुपयांच्या नोटांची छपाई थांबविण्यात आली आहे.