फुले मार्केटमधील 24 गाळे सील
पोलीस बंदोबस्तात मनपा प्रशासनाची कारवाई ; गाळेधारकांमध्ये खळबळ
जळगाव– मनपा मालकीच्या मुदत संपलेल्या व्यापारी संकुलातील गाळेधारकांना थकबाकी भरण्याबाबत कलम 81 क ची नोटीस बजावली होती.काही गाळेधारकांनी पूर्ण रक्कमेचा भरणा केला तर काही गाळेधारकांनी अर्धी रक्कम भरली आहे.मात्र आतापर्यंत थकीत रकमेचा भरणा केला नाही अशा गाळेधारकांची प्रशासनाने यादी तयार केली आहे.दरम्यान,मनपा प्रशासनाने गुरुवारी सकाळपासून पोलीस बंदोबस्तात गाळे सील करण्याची कारवाई सुरु केली.सांयकाळपर्यंत 27 गाळे सील करण्यात आले आहे.या कारवाईमुळे गाळेधारकांमध्ये प्रचंड खळबळ उडाली आहे.
महापालिका मालकीच्या फुले व सेंट्रल फुले मार्केटमधील भाडे कराराची मुदत संपलेल्या साडेनऊशे गाळेधारकांना 81 क च्या नोटीसा बजावून दि. 11 ऑक्टोंबर पर्यंत पैसे भरण्याची मुदत दिली होती. वारंवार नोटीसा देवून देखील काही गाळेधारकांनी एकही रुपयाचा भरणा केलेला नव्हता. अश्या थकबाकी असलेल्या गाळेधारकांविरुध्द महापालिका प्रशासनाने पुन्हा गाळे सीलची कारवाई सुरु केली आहे.उपायुक्त डॉ.उत्कर्ष गुटे यांच्या मार्गदर्शनाखाली गुरूवारी दोन पथकांच्या माध्यमातून गाळे सील कारवाईला सुरुवात झाली. यात प्रभाग अधिकारी विलास सोनवणी व अतिक्रमण अधिक्षक एच.एम.खान यांच्या नेतृत्वात तसेच किरकोळ वसुली विभागाचे अधीक्षक नरेंद्र चौधरींच्या उपस्थितीत 14 व 13 गाळ्यांची यादी तयार करून सकाळी साडेअकरा वाजतापासून गाळे सील करण्यास सुरूवात झाली. महात्मा फुले मार्केटमधील तळमजल्यावरील व पहिल्या मजल्यावरील गाळे मालासह सील करण्यात आले.
गाळेधारकांचा गोंधळ
गाळेधारकांनी प्रशासनाच्या कारवाईला विरोध नसला तरी एवढे दुकाने असताना आमचीच दुकाने का सील करताय. पहिल्या क्रमांकाच्या गाळ्यापासून कारवाई का करत नाहीत? असा प्रश्न उपस्थित करत गाळेधारकांनी गोंधळ घातला. यावेळी पोलीस बंदोबस्तात दुकानांचा वीजपुरवठा बंद करून पंचनामा केल्यानंतर कुलूप लावून सील करण्यात आले.
दुकानांमध्ये काही गाळेधारकांना केला अंतर्गत बदल
महात्मा फुले मार्केटच्या तळमजल्यावर बांधकाम करताना कॉलम टाकण्यात आले होते. त्यामुळे खालच्या व वरच्या मजल्याच्या दरम्यान जी मोकळी जागा झाली त्या जागेचा अनेक दुकानदारांनी विनापरवानगी वापर सुरू ठेवला आहे. बहुसंख्य दुकानांमध्ये भुयारी मार्ग तयार करून त्या जागेचा व्यवसायासाठी वापर करीत असल्याचे कारवाई दरम्यान निदर्शनास आले.महात्मा फुले मार्केटच्या पहिल्या मजल्यावर अनेक दुकानदारांनी केलेला अंतर्गत बदल चौकशी दरम्यान उघडकीस आला. दुकान क्रमांक 28,29 व 30 साठी एकच दरवाजा असल्याचे अधिकार्‍यांच्या निदर्शनास आले. यावेळी सर्वच मार्गांना सील लावण्यात आले. काही दुकानदारांनी पैसे भरण्यासाठी काही वेळ द्यावा अशी विनंती केली परंतु पालिकेच्या पथकांनी संधी न देता कारवाई केली. सायंकाळपर्यंत ही कारवाई सुरु होती.