शबरीमाला मंदिर हिंसाचार प्रकरणी ४५२ जणांवर गुन्हा दाखल

0

थिरूवनंतपुरम- केरळमधील प्रसिद्ध शबरीमला मंदिरात सर्व वयोगटातील महिलांना प्रवेश देण्याचा ऐतिहासिक निर्णय सुप्रीम कोर्टाने दिला. सुप्रीम कोर्टाच्या या आदेशाविरोधात आंदोलन करताना हिंसाचार घडवून आणल्याप्रकरणी केरळ पोलिसांनी २०१६ लोकांना ताब्यात घेतले आहे. तर ४५२ जणांवर गुन्हे दाखल केले आहेत. हिंसाचार केल्याप्रकरणी इतर अनेकांचीही ओळख पटली असून आणखी लोकांना ताब्यात घेण्यात येणार आहे. याबाबत योग्य ती कायदेशीर कारवाई करण्यात येणार आहे असे सांगण्यात येत आहे.

सुप्रीम कोर्टाच्या आदेशाचे पालन करताना महिलांना मंदिरात प्रवेश देताना सुरक्षा पुरवण्यासाठी काय करता येईल, यासाठी पोलीस कमिटीकडून सूचना मागवण्यात येत आहेत. केरळमधील शबरीमला मंदिरात सर्व वयोगटातील महिलांना प्रवेशापासून रोखता येणार नाही असा आदेश नुकताच सुप्रीम कोर्टाने दिला होता. त्यानंतर या निर्णयाविरोधात शबरीमला मंदिर परिसरात अनेक हिंदू संघटनांकडून जोरदार विरोध करण्यात आला. आंदोलकांनी या मंदिरात महिलांना जाण्यापासून रोखले. प्रसंगी दगडफेक आणि जाळपोळही करण्यात आली होती. या घडामोडीत मंदिराचे दरवाजे ठराविक काळानंतर बंद झाल्याने महिलांना या मंदिरात प्रवेश करता आला नाही.