‘शोले’तील कालिया पात्र साकारणारे विजू खोटेंचे निधन !

मुंबई: शोले चित्रपटातील कालिया हा पात्र प्रत्येकांच्या मनात आहे. आजची नवीन पिढी देखील या पात्राची चाहती आहे. हा पात्र ज्या कलाकाराने साकारले होते ते मराठमोळे ज्येष्ठ अभिनेते विजू खोटे यांचे वृद्धापकाळाने निधन झाले. ते ७८ वर्षांचे होते. गावदेवी येथील राहत्या घरी त्यांची प्राणज्योत मालवली. विजू खोटे यांच्या पार्थिवावर आज अंत्यसंस्कार करण्यात आले. त्यांच्या निधनामुळे सर्वत्र हळहळ व्यक्त होत असून त्यांना श्रद्धांजली अर्पण करण्यात येत आहे.

शोलेतील गब्बर ‘अबे ओ कालिया, तेरा क्या होगा?’, असे विचारतो तेव्हा कालिया घाबरत उत्तर देतो, ‘कु..कु..छ नही सरकार, मैने तो आपका नमक खाया हैं’ हा संवाद अंत्यंत गाजला. १९७५ मध्ये प्रदर्शित झालेल्या सिनेमाची चर्चा होते, तेव्हा कालियाचे पात्र हमखास चर्चेत येते. विनोदी पात्रासाठी ते प्रसिद्ध होते.

अभिनेते विजय खोटे यांनी आपल्या चतुरस्त्र अभिनयाने हिंदी-मराठी सिनेमा सृष्टीत वेगळी ओळख निर्माण केली होती. मराठी रंगभूमीबरोबर त्यांनी मराठी आणि हिंदी चित्रपटात दमदार भूमिका केल्या. भारतीय सिने इतिहासात विशेष नोंद केल्या गेलेल्या शोले सिनेमातील कालियाची भूमिका प्रेक्षकांच्या मनात कायमची कोरली गेली.

खोटे यांनी तीनशेहून अधिक चित्रपटांमध्ये काम केले. मराठीतील ‘या मालक’, ‘अशी ही बनवाबनवी’, ‘आयत्या बिळावर नागोबा’ या चित्रपटातील त्यांची भूमिका विशेष गाजली. त्यांनी असंख्य छोट्या भूमिका केल्या. अभिनय कौशल्य आणि अप्रतिम संवादफेक लाभलेल्या खोटे यांनी साकारलेल्या भूमिका दर्शकांच्या मनात कायम राहिल्या. विजू खोटे यांनी आपल्या कारकीर्दीला नायकाच्या भूमिकेपासून प्रारंभ केला. पुढे त्यांनी छोट्या परंतु स्मरणात राहतील अशा भूमिका साकारल्या.