सोनिया-राहुल गांधींना इन्कमटॅक्सची नोटीस; १०० कोटी भरण्याबाबत आदेश

नवी दिल्ली- ‘नॅशनल हेरॉल्ड’प्रकरणात काँग्रेस अध्यक्ष राहुल गांधी, सोनिया गांधी यांना इन्कमटॅक्स विभागातर्फे नोटीस बजावण्यात आली आहे. सोनिया-राहुल गांधींनी १०० कोटी रुपये भरावेत, असे या नोटीशीत म्हटले आहे. राहुल गांधी यांचे २०११- १२ मधील उत्पन्न १५५. ४१ कोटी रुपये तर याच कालावधीतील सोनिया गांधी यांचे उत्पन्न १५४. ९६ कोटी रुपये इतके होते.

‘नॅशनल हेरॉल्ड’प्रकरणात काँग्रेस अध्यक्ष राहुल गांधी, सोनिया गांधी आणि ऑस्कर फर्नांडिस यांच्या २०११-१२ या वर्षांतील प्राप्तिकराची पुन्हा चौकशी करण्यास सुप्रीम कोर्टाने डिसेंबरमध्ये परवानगी दिली होती. सुप्रीम कोर्टाच्या आदेशानंतर प्राप्तिकर विभागाने दोघांच्या प्राप्तिकराचे पुनर्मूल्यांकन केले आहे. राहुल गांधी यांचे २०११- १२ मधील उत्पन्न १५५. ४१ कोटी रुपये तर सोनिया गांधींचे उत्पन्न १५४. ९६ कोटी रुपये असल्याचे प्राप्तिकर विभागाच्या चौकशीतून उघड झाले आहे. तर काँग्रेस नेते ऑस्कर फर्नांडिस यांचे याच कालावधीत उत्पन्न ४८. ९३ कोटी रुपये इतके आहे. राहुल आणि सोनिया यांनी ३०० कोटींचे उत्पन्न लपवले असून यासाठी त्यांनी १०० कोटी रुपये भरण्याची नोटीस प्राप्तिकर विभागाने पाठवली आहे. पुनर्मूल्यांकन केल्यानंतर ३१ डिसेंबर रोजी दोघांनाही नोटीस पाठवण्यात आली आहे.