इस्रोच्या माजी संचालकांचा फ्रांसकडून सर्वोच्च पुरस्काराने सन्मान

नवी दिल्ली: भारत आणि फ्रान्समधील अंतराळ सहकार्य वाढवण्यात मोलाचे योगदान दिल्याबद्दल इस्रोचे माजी संचालक ए.एस.किरण कुमार यांना फ्रान्सने सर्वोच्च नागरी पुरस्काराने सन्मानित केला आहे. ‘शेवेलियर डी लॉर्ड नेशनल डी ला लिगियन डी ऑनर’ नावाने हा सन्मान ओळखला जातो. फ्रान्सच्या राष्ट्रपतींच्या वतीने फ्रान्सचे भारतातले राजदूत ऍलेक्झांडर जिगलर यांनी कुमार यांना सन्मानित केले.

दोन देशांमधील अंतराळ तंत्रज्ञानाला नवा आयाम दिल्याबद्दल कुमार यांचा सन्मान केल्याचे फ्रान्सची अंतराळ संशोधन संस्था सीएनईएसचे संचालक जीन येव्स ले गाल यांनी सांगितले. ‘किरण कुमार यांनी केलेली कामगिरी सोपी नव्हती. 2015 ते 2018 या काळात इस्रोचं संचालक म्हणून काम करताना त्यांनी ऐतिहासिक भूमिका बजावली. भारत आणि फ्रान्स यांच्यातलं अंतराळ सहकार्य एका वेगळ्या उंचीवर नेण्यात त्यांचा सिंहाचा वाटा आहे,’ अशा शब्दांत ले गाल यांनी फ्रान्सच्या वतीनं कुमार यांचं तोंडभरुन कौतुक केले.

‘शेवेलियर डी लॉर्ड नेशनल डी ला लिगियन डी ऑनर’ पुरस्काराला खूप मोठा इतिहास आहे. 1802 मध्ये नेपोलियन बोनापार्ट यांनी या पुरस्काराची सुरुवात केली. हा फ्रान्सचा सर्वोच्च नागरी पुरस्कार आहे. देशासाठी विशेष कामगिरी करणाऱ्या व्यक्तींना हा पुरस्कार दिला जातो. फ्रान्सशिवाय इतर देशांच्या नागरिकांनादेखील या पुरस्कारानं गौरवण्यात येतं.