मद्रास न्यायालयाने ‘टीक-टॉक’वरील बंदी उठवली !

मद्रास:तरुणांना वेड लावणाऱ्या ‘टीक-टॉक’ अ‍ॅपवर केंद्र सरकारच्या निर्देशानंतर बंदी आणण्यात आली आहे. गुगल आणि अ‍ॅपलने प्ले स्टोरवरून ‘टीक-टॉक’ अ‍ॅप हटवले आहे. दुसरीकडे टीक टॉक कंपनीने भारतात अ‍ॅपवरील ६० लाखांहून अधिक व्हिडिओ हटवले आहेत. दरम्यान आज मद्रास उच्च न्यायालयाच्या मदुराई खंडपीठाने ‘टीक-टॉक’ अ‍ॅपवरील बंदी उठवली आहे. गेल्या जुलैपासून आतापर्यंत नियमांचे उल्लंघन करणारे व्हिडिओ अ‍ॅपवरून हटवल्याचे कंपनीने स्पष्ट केले आहे.

टीक टॉक अ‍ॅपने तरुणाईला अक्षरक्ष: वेड लावले होते. या अॅपमधून अनेकजण मनोरंजक व्हिडिओ बनवत होते. मात्र, त्याचवेळी या अ‍ॅपद्वारे अश्लील व्हिडिओ आणि हिंसाचारास प्रोत्साहन देणारे व्हिडिओ अपलोड होत असल्याच्या तक्रारी समोर आल्या. त्यानंतर मद्रास हायकोर्टात अ‍ॅपवर बंदी आणण्यासाठी याचिका दाखल झाली होती. हायकोर्टाने अ‍ॅपवर बंदी आणण्याचे निर्देश सरकारला दिले होते. त्यानुसार, गुगल आणि अ‍ॅपलच्या प्ले स्टोरवरून टीक टॉक अ‍ॅप हटवण्यात आले आहे. दुसरीकडे कंपनीनंही कारवाई करत अ‍ॅपवरून ६० लाख व्हिडिओ हटवले आहेत. टीक टॉकच्या यूजर्सना सुरक्षित वाटावं म्हणून ही कारवाई केल्याचं टीक टॉकनं स्पष्ट केलं आहे. तसंच टीक टॉकचा वापर फक्त १३ वर्षांवरील मुलं करू शकतात. कमी वयाची मुलं या अ‍ॅपचा वापर करू शकणार नाहीत, असंही कंपनीने सांगितले.