आज सरकारतर्फे होतोय जीएसटी दिवस साजरा तर व्यापारी करतायेत विरोध

नवी दिल्ली-आज वस्तू आणि सेवा कराच्या (जीएसटी) वर्षपूर्तीनिमित्त भाजपाकडून देशभरात ‘जीएसटी दिन’साजरा केला जात आहे. अर्थमंत्रालयाकडून याबाबत माहिती देण्यात आली आहे. दुसरीकडे, उत्तर प्रदेश आणि गुजरातच्या सुरतसह देशाच्या अन्य भागांमध्ये व्यापारी विरोध प्रदर्शन करण्याच्या तयारीत आहेत. शनिवारीही व्यापाऱ्यांनी विरोध प्रदर्शन केले त्यात काही जणांनी आपली दुकानंही बंद केली होती.

गेल्या वर्षी संसदेच्या सेंट्रल हॉलमध्ये ३० जून २०१७ च्या मध्यरात्री खास कार्यक्रमाचे आयोजन करून जीएसटी पर्वाची सुरुवात केली गेली. आज याला एक वर्ष पूर्ण झाले, या निमित्त होणाऱ्या कार्यक्रमाचे प्रमुख पाहुणे म्हणून केंद्रीय अर्थमंत्री पियुष गोयल असतील, तर सन्माननीय पाहुणे म्हणून अर्थराज्यमंत्री शिवप्रताप शुक्ला उपस्थित राहणार आहेत, असे अर्थमंत्रालयाने निवेदनात म्हटले आहे.

जीएसटी लागू झाल्यानंतर आता वर्षभरात देशभरातील करदात्यांची संख्या 1.20 कोटी झाली आहे. त्यामध्ये महाराष्ट्राचा आकडा 9.10 लाख आहे. राज्यातील करदात्यांचा वाटा 7 टक्क्यांवर आला आहे. एकीकडे देशातील जीएसटीदात्यांची संख्या 56 लाखांनी वाढली असताना राज्यातील ही वाढ फक्त 60 हजारांइतकी आहे. जीएसटी करप्रणालीनं सरकारच्या तिजोरीवर जास्त भार पडलेला नाही. उलट करदात्यांच्या संख्येत वाढ झाली आहे. जीएसटी करप्रणालीमुळे महागाई वाढल्याचं समोर आलं आहे. तसेच पेट्रोल आणि डिझेलला जीएसटीच्या कक्षात न आणल्यामुळे इंधनाचे भावही भडकले आहेत.