ममता बॅनर्जी यांना हादरा; तृणमूलच्या खासदाराचा भाजपात प्रवेश

कोलकाता-लोकसभा निवडणुकीचे वारे वाहू लागले आहे, अशातच पश्चिम बंगालमध्ये तृणमूल काँग्रेसचे खासदार सौमित्र खान यांनी आज बुधवारी भाजपात प्रवेश केला. ममता बॅनर्जी यांच्यासाठी हादरा मानला जात आहे. तृणमूल काँग्रेसचे लोकसभेतील खासदार तृणमूल काँग्रेसचे आणखी पाच खासदार निवडणुकीपूर्वी भाजपात प्रवेश करतील, असा दावाही भाजपा नेत्यांनी केल्याने तृणमूल काँग्रेसच्या गोटात खळबळ उडाली आहे.

सौमित्र खान हे गेल्या काही दिवसांपासून पक्षनेतृत्वावर नाराज होते. पोलीस अधिकाऱ्याने मला ठार मारण्याचा प्रयत्न केला, असा आरोप त्यांनी केला होता. यानंतर पक्षश्रेष्ठींनी सौमित्र यांच्या या विधानावर नाराजी व्यक्त केली होती. तेव्हापासूनच सौमित्र खान हे पक्षनेतृत्वावर नाराज होते, असे सूत्रांनी सांगितले. बुधवारी सकाळी सौमित्र खान यांनी अमित शाह यांची भेट घेतल्याने ते भाजपात जाणार असल्याचे स्पष्ट झाले होते. दुपारी त्यांनी केंद्रीय मंत्री धर्मेंद्र प्रधान आणि पश्चिम बंगालमधील भाजपा नेते मुकूल रॉय यांच्या उपस्थितीत भाजपात प्रवेश केला. मला मोदींसोबत काम करायचे आहे, असे त्यांनी सांगितले.