शोपियानमध्ये दोन दहशतवाद्यांचा खात्मा !

शोपियान: दक्षिण काश्मीरमधील शोपियान जिल्ह्यात सुरक्षा जवान आणि दहशतवाद्यांमध्ये आज शुक्रवारी सकाळी चकमक उडाली. यात दोन दहशतवाद्यांचा खात्मा करण्यात सैनिकांना यश आले आहे. दारगाड सुगन परिसरात ही चकमक सुरु झाली होती. अद्यापही चकमक सुरु आहे. शोपियानमधील सुगान परिसरात दहशतवादी लपून बसल्याची माहिती मिळाल्यानंतर भारतीय लष्कराच्या राष्ट्रीय रायफल्स (आरआर), सीआरपीएफ आणि एसओजीने मिळून शोध मोहीम सुरु केली.

याआधी गुरुवारी बारामुला जिल्ह्यातील सोपोरमधील डांगरपोरा येथे चकमकीत भारतीय जवानांनी दोन दहशतवाद्यांना ठार केले होते. यावेळी काही दहशतवादी अडकले होते. तसेच बुधवारी सुरक्षा दलांकडून शोपियान जिल्ह्यातील पिंजूरा गावात सुरु असलेल्या मोहिमेविरोधात हिंसा भडकली होती. यामध्ये निदर्शन करणाऱ्या एका व्यक्तीचा मृत्यू झाला होता तर २० जण जखमी झाले होते.