अपघातात दुचाकीस्वाराचा मृत्यू ; जमावाने पेटवला डंपर

मुक्ताईनगर- रस्त्यावर बेशिस्तपणे उभ्या केलेल्या डंपरवर दुचाकी आदळून झालेल्या अपघातानंतर दुचाकीस्वाराचा मृत्यू ओढवला तर सहकारी जखमी झाल्याची घटना महाराष्ट्र दिनी पहाटे एक वाजता तालुक्यातील पिंप्री अकराऊतजवळ राष्ट्रीय महामार्ग क्रमांक सहावर घडली होती. या घटनेनंतर संतप्त जमावाने डंपरच्या काचा फोडत तो पेटवून दिला तर उपजिल्हा रुग्णालयातही काचा फोडून शासकीय कामात अडथळा आणल्याप्रकरणी मुक्ताईनगर पोलिसात गुन्हा दाखल करण्यात आला. या प्रकरणी चार जणांना अटक करण्यात आली असून न्यायालयाने त्यांना 8 मे पर्यंत पोलीस कोठडी सुनावली.

नादुरुस्त डंपर
पिंप्री अकराऊत फाट्याजवळील राष्ट्रीय महामार्ग क्रमांक सहावर नादुरुस्त डंपर (एम.एच.19 झेड 4983) हा बेशिस्तपणे उभा असताना तरोडा येथील विठ्ठल लक्ष्मण झाल्टे व अर्जुन नामदेव पिवटे हे दोघे दुचाकी (एम.एच.19 सीडी 2173) ने मुक्ताईनगरकडे येत असताना दुचाकी डंपरवर आदळली. या अपघातात विठ्ठल लक्ष्मण झाल्टे (23) हा युवक जागीच ठार झाला तर अर्जुन पिवटे हा जखमी झाला. या प्रकरणी प्रभाकर पिवटे (रा. तरोडा, ता.मुक्ताईनगर) यांच्या फिर्यादीवरुन अज्ञात डंपर चालकाविरुद्ध गुन्हा दाखल करण्यात आला.

प्रक्षुब्ध जमावाने पेटवला डंपर
विठ्ठल झाल्टे या तरुणाचा अपघातात मृत्यू झाल्याची वार्ता कळताच हरताळा येथील तेजस भावराव बाणाईत, विजय अरुण अहिर, राम श्रीकृष्ण जांभूळकर, रवींद्र एकनाथ पाटील व इतर 10 ते 12 जणांच्या संतप्त जमावाने मध्यरात्रीच दीड ते दोन वाजेच्या सुमारास घटनास्थळ गाठुन नादुरुस्त डंपरच्या काचा फोडून डंपर पेटवून नुकसान केले तसेच रस्त्याने येणार्‍या-जाणार्‍या वाहनांवरदेखील मोर्चा वळवून वाहनांच्या काचा फोडल्या. या प्रकारानंतर मुक्ताईनगर पोलिसांनी घटनास्थळी धाव घेत वाहतूक सुरळीत केली.

उपजिल्हा रुग्णालयात तोडफोड 
संतप्त जमावाने मयत झाल्टे या तरुणाचे प्रेत शवविच्छेदनासाठी उपजिल्हा रुग्णालयात नेले असता रुग्णालयाच्या खिडक्यांच्या तोडफोड करुन शासकीय कामात अडथळा निर्माण केला. याप्रकरणी हवालदार रवीसपकाळे यांच्या फिर्यादीवरुन तेजस बाणाईत, विजय अहिर, राम जांभूळकर, रवींद्र पाटील व इतर 10 ते 12 जणांविरुद्ध दंगलीचा व सरकारी कामात अडथळा निर्माण केल्याचा गुन्हा दाखल करण्यात आला आहे. चारही आरोपींना अटक करण्यात आली. तपास सहाय्यक फौजदार माणिक निकम करीत आहे.