यूजीसीकडून बोगस विद्यापीठांना चाप

देशातील २४ विद्यापीठ बोगस

दिल्ली – बारावी परीक्षेचा निकाल महिन्याभरानंतर लागणार आहे. तत्पूर्वी विद्यापीठ अनुदान आयोगाने (युजीसी) देशभरातील बोगस विद्यापीठांच्या नावाची यादी जाहीर केली आहे. बोगस विद्यापीठांच्या नावाची यादी जाहीर झाल्याने शिक्षण क्षेत्रात खळबळ उडाली आहे. बारावी परीक्षेचा निकाल लागल्यानंतर पुढील शिक्षणासाठी क्षेत्र निवडताना विद्यार्थ्यांनी सतर्क राहावे यासाठी विद्यापीठाने हि पाऊले उचलली आहे. देशभरात स्वयम घोषित आणि मान्यता नसलेली 24 विद्यापीठं यूजीसीच्या नियमांचं उल्लंघन करुन सुरु आहेत. या विद्यापीठांना बोगस घोषित केलं आहे. त्यांना कोणतीही पदवी देण्याचा अधिकार नाही, असं पत्रक यूजीसीने जारी केलं आहे.

24 बनावट विद्यापीठात राजधानी दिल्लीतील ८ विद्यापीठांचा समावेश आहे. दिल्लीतील कमर्शियल युनिव्हर्सिटी, युनायटेड नेशन्स युनिव्हर्सिटी, व्होकेशनल युनिव्हर्सिटी, एडीआर-सेंट्रिक जूरिडिकल युनिव्हर्सिटी, इंडियन इंस्टिट्यूशन ऑफ सायन्स अँड इंजिनियरिंग, विश्वकर्मा ओपन युनिव्हर्सिटी फॉर सेल्फ एम्प्लॉयमेंट, आध्यात्मिक विश्वविद्यालय आणि वाराणसेय संस्कृत विश्वविद्यालय या विद्यापीठांचा समावेश आहे. दिल्लीशिवाय देशातील अन्य शहरांमध्येही बनावट विद्यीपीठं आहेत. महाराष्ट्रातील नागपूरमध्येही एक बनावट विद्यापीठ आहे. राजा अरेबिक विद्यापीठ, नागपूर हे महाराष्ट्रातील एकमेव विद्यापीठ बोगस विद्यापीठाच्या यादीत आहे. याशिवाय उत्तर प्रदेशातील अलीगढ, कानपूर, प्रतापगढ, मथुरा, कानपूर आणि अलाहाबाद मधील विद्यापीठांचा समावेश आहे. तसंच ओदिशा, पुद्दुचेरी, कर्नाटक, केरळ आणि बिहारचाही या यादीत समावेश आहे.