पाच लाखांच्या मताधिक्याने उन्मेष पाटील निवडून येतील – ना. महाजन

पारोळा येथे महायुतीच्या मेळाव्यात सर्वाधिक लीड देण्याचा निर्धार

पारोळा प्रतिनिधी । उत्तर महाराष्ट्रात राष्ट्रवादी काँग्रेसचे अस्तित्व संपुष्टात आले आहे.राष्ट्रवादीचे एकमेव शेंडेफळ पारोळा मध्ये आहे. मी जेथे जातो तेथे प्रामाणिक कार्यकर्त्यांच्या जीवावर विजयश्री खेचून आणतो. त्यामुळे येत्या काळात त्यांना डिपॉझिट वाचवायची वेळ येणार आहे. लोकसभा मतदार संघात नगराध्यक्ष करण पवार यांच्या सारखा कार्यकर्त्यांमुळे युती अधिक भक्कम झाल्याने येत्या आगामी लोकसभा निवडणुकीत उन्मेश पाटील पाच लाख मतांच्या मताधिक्क्याने निवडून येतील असा विश्‍वास जलसंपदा मंत्री ना. गिरीश महाजन यांनी व्यक्त केला.
पारोळा येथे आयोजीत महायुतीच्या मेळाव्यात ते बोलत होते. यावेळी व्यासपीठावर कार्यक्रमाचे अध्यक्ष माजी आमदार चिमणराव पाटील, जि.प. अध्यक्षा ना. उज्वला मच्छिंद्र पाटील,पाचोराचे आमदार किशोर पाटील, आमदार तथा महायुतीचे उमेदवार उन्मेष पाटील, विधान परिषद सदस्य चंदुलाल पटेल, सिंधी समाज राष्ट्रीय अध्यक्ष माजी आमदार गुरुमुख जगवाणी, एरंडोलचे नगराध्यक्ष रमेश परदेशी, पारोळ्याचे लोकनियुक्त नगराध्यक्ष युवानेते करण पवार ज्येष्ठ नेते बाळासाहेब पवार , आरपीआयचे जिल्हा प्रमुख आनंद खरात, रासपचे गणेश जाणे यांच्यासह अनेक पदाधिकारी कार्यकर्ते सहभागी झाले होते. ना. महाजन पुढे म्हणाले की, युती अभेद्य राहील. त्यामुळे येत्या विधानसभेत चिमणराव आबा आमदार म्हणून निवडून येतील. लोकसभा मतदार संघात करण पवार सारखा उमदा कार्यकर्त्यांमुळे मतदारसंघात युतीला भरघोस पाठिंबा मिळतो आहे असेही ना. गिरीश महाजन यांनी सांगितले.