मुक्ताईनगर तालुक्यात अवकाळी पावसाचा तडाखा ; पिकांचे नुकसान

मुक्ताईनगर प्रतिनिधी

अचानक वातावरणात बदल होऊन उद्भवलेल्या नैसर्गिक वादळ वाऱ्यासह जोरदार पावसाने शुक्रवारी दुपारी २:३० ते ३ वाजेच्या दरम्यान मुक्ताईनगर परिसराला चांगले झोडपले. वादळवाऱ्याने अनेक ठिकाणी वृक्ष कोलमडून पडले तर विजेच्या खांबांसह तारा तुटण्याच्या घटना घडल्या. तर शेतीपिकांचेही प्रचंड मोठ्याप्रमाणात नुकसान झाले आहे.

दरम्यान, आज शुक्रवारी २८ एप्रिल रोजी बोदवड कृषी उत्पन्न बाजार समितीची लगबग सुरू होती. त्यातच भरदुपारी आलेल्या अवकाळी वादळीवाऱ्यासह पावसाने प्रचंड नुकसान केल्याचे दिसून आले. निवडणुकीच्या कामकाजात व्यस्त असताना देखील आमदार चंद्रकांत पाटील यांनी लागलीच पिंप्री आकाराऊत घोडसगाव परिसरातील काही शेतकऱ्यांच्या बांधावर जावून पाहणी केली. यावेळी तहसीलदार श्वेता संचेती यांना लागलीच पंचनामे करण्याच्या सूचना केल्या. तसेच वादळी पावसाचा प्रचंड तडाखा पाहता मतदारसंघातील इतर ही गावांमध्ये नुकसान झाल्याचे दिसून येत आहे. आ. चंद्रकांत पाटील यांनी तहसीलदार श्वेता संचेती यांच्यासह कृषी विभागाला सर्वेक्षण करून पंचनामे करण्याच्या सूचना दिल्या. दरम्यान, प्रवर्तन चौकातील एसटी बस आगारासमोर मोठे झाड वादळाने तुटुन पडल्याने रहदारी ठप्प झाली होती. आमदारांनी येथे स्वतः उपस्थित राहून जेसीबीद्वारे झाडाला काढून रस्ता मोकळा केला.