ज्या आईच्या गर्भातून जन्माला आली त्याच आईच्या गर्भाने झाली गर्भवती

पुणे – पुण्यातील एका रुग्णालयात उपचार घेत असलेली गुजरातच्या भारुच येथील महिला गर्भाशय प्रत्यारोपणानंतर गर्भवती राहिली आहे. गर्भाशय प्रत्यारोपणाच्या माध्यमातून आई बनण्याचा आनंद तिला अनुभवता येत आहे. पण यामागे विज्ञानाचा मोठा अविष्कार पाहायला मिळत आहे. जी महिला गर्भवती आहे तिला तिच्या आईने तिला हे गर्भाशय दिले आहे.

मी जन्मले त्या गर्भातूनच माझे बाळ जन्म घेणार
या महिलेला तिच्या आईनेच गर्भाशय दान केले आहे. त्याच्या प्रत्यारोपणानंतर ती आता गर्भवती असल्याने अत्यंत आनंदी आहे. याबाबत बोलताना महिला म्हणाली की, ज्या गर्भाशयातून माझा जन्म झाला, त्याच गर्भाशयातून आता माझे बाळही जन्म घेणार आहे याचा मला अत्यंत आनंद होत आहे. गुजरातच्या ज्या महिलेला गर्भाशय प्रत्यारोपण करण्यात आले होते, ही महिला गर्भाशयाविनाच जन्माला आली होती. तिच्या आईचे गर्भाशय प्रत्यारोपण करून तिला बसवण्यात आले होते. गेल्या 20 वर्षांत अशा प्रकारची डिलेव्हरी झालेली नसल्याचे पुण्यातील डॉक्टर शैलेष पुणतांबेकर यांनी सांगितले. प्रत्यारोपित गर्भाशयाद्वारे होणारी ही आशियातील पहिली आणि जगातील नववी डिलेव्हरी ठरणार असल्याचेही डॉक्टर म्हणाले.